აშშ-ის სახელმწიფო დეპარტამენტი აცხადებს, რომ აშშ შეშფოთებულია მთიან ყარაბაღში განვითარებული მოვლენებით და მხარეებს ძალადობის შეწყვეტისა და პირდაპირი კომუნიკაციისკენ მოუწოდებს.
„აშშ უმკაცრესად გმობს ძალადობის ესკალაციას. სახელმწიფო მდივნის მოადგილე ბიგუნმა მოუწოდა აზერბაიჯანის საგარეო საქმეთა მინისტრ ჯეიჰან ბაირამოვსა და სომხეთის საგარეო საქმეთა მინისტრ ზოჰრაბ მნაცაკანიანს, დაუყოვნებლივ შეწყდეს ძალადობა, გამოიყენონ პირდაპირი კომუნიკაციის მოქმედი არხი, რათა ესკალაცია არ გაგრძელდეს და თავიდან აიცილონ უსარგებლო რიტორიკა და ქმედებები, რაც ადგილზე დაძაბულობას კიდევ უფრო ზრდის“, – აღნიშნულია აშშ-ის სახელმწიფო დეპარტმანეტის მიერ გავრცელებულ განცხადებაში.
აშშ მიიჩნევს, რომ გარე ძალების მონაწილეობა კიდევ უფრო მეტად დაძაბავს რეგიონში ვითარებას.
„შეერთებულ შტატებს მიაჩნია, რომ გარე მხარეების მონაწილეობა მზარდ ძალადობაში სრულიად უსარგებლო იქნება და რეგიონულ დაძაბულობას მხოლოდ გაამწვავებს. ჩვენ მხარეებს მოვუწოდებთ, იმუშაონ ეუთოს მინსკის ჯგუფის თანათავმჯდომარეებთან, რათა რაც შეიძლება მალე დაუბრუნდნენ არსებით მოლაპარაკებებს", - აღნიშნულია განცხადებაში.