„საპენსიო სააგენტომ” საინვესტიციო პოლიტიკის დოკუმენტი დაამტკიცა, რომელიც საპენსიო დანაზოგების ინვესტირების სტრატეგიას წარმოადგენს, - ამის შესახებ „საპენსიო სააგენტოს“ დირექტორის მოვალეობის შემსრულებელმა გიორგი ჭიჭინაძემ საინვესტიციო პოლიტიკის დოკუმენტის პრეზენტაციაზე განაცხადა.

მისი თქმით, დოკუმენტი სრულ შესაბამისობაშია დაგროვებითი პენსიის შესახებ საქართველოს კანონთან, არსებულ რეგულაციებთან და უკვე ოფიციალურადაა დადასტურებული ეროვნული ბანკის მიერ.

„საინვესტიციო საქმიანობას დამოუკიდებელი საინვესტიციო საბჭო წარმართავს, რომელიც დაკომპლექტებულია მაღალკვალიფიციური უცხოელი წევრებით, ზედამხედველობას ეროვნული ბანკი ახორციელებს, შესაბამისად, მონაწილეებისთვის იქმნება ისეთი გარემო, რომ მათი დანაზოგი მაქსიმალურად დაცული იქნას.

დღევანდელი მონაცემებით, „საპენსიო სააგენტო“ მართავს მილიარდი ლარის აქტივებს, ხოლო ამონაგების სახით 100 მილიონ ლარამდე თანხაა მობილიზებული“,-აღნიშნა გიორგი ჭიჭინაძემ.