აზერბაიჯანის პრეზიდენტმა ილჰამ ალიევმა ვიდეოკონფერენციის ფარგლებში გაეროს გენერალურ მდივანს ანტონიუ გუტიერეშს განუცხადა, რომ მთიან ყარაბაღთან დაკავშირებული კონფლიქტი უნდა დარეგულირდეს გაეროს უშიშროების საბჭოს რეზოლუციის საფუძველზე. ამის შესახებ პრეზიდენტის პრესსამსახური იუწყება.

„აზერბაიჯანის პრეზიდენტმა განაცხადა, რომ სომხეთ-აზერბაიჯანის კონფლიქტი მთიან ყარაბაღთან დაკავშირებით უნდა დარეგულირდეს მხოლოდ და მხოლოდ საერთაშორისო სამართლის ნორმების, აზერბაიჯანის ტერიტორიული მთლიანობის და გაეროს უშიშროების საბჭოს შესაბამისი რეზოლუციების საფუძველზე, რომლებიც მოითხოვს სომხეთის შეიარაღებული ძალების დაუყოვნებლივ და უპირობო გაყვანას ოკუპირებული ტერიტორიიდან“, - განაცხადეს ალიევის პრესსამსახურში.

შეგახსენებთ, 27 სექტემბრის შემდეგ მთიან ყარაბაღში სომხეთ-აზერბაიჯანს შორის შეიარაღებული დაპირისპირება მიმდინარეობს. მხარეები მძიმე არტილერიის გამოყენებაში ერთმანეთს ადანაშაულებენ. დაპირისპირების შედეგად დაღუპულებსა და დაშავებულებს შორის მშვიდობიანი მოქალაქეებიც არიან.