31 ოქტომბერს არცერთი მხარე არ იქნება მომხრე, აღიაროს მეორე მხარის გამარჯვება და პირდაპირ შემიძლია გითხრათ, რომ მშვიდობიანი სცენარი ვერ იქნება, რადგან ხელისუფლება დასამშვიდებლად არაფერს გვთავაზობს, - ამის შესახებ პოლიტიკური მოძრაობა "ტრიბუნას" ლიდერმა დავით ჭიჭინაძემ „პალიტრანიუსის“ გადაცემა „დღის ნიუსრუმში“ განაცხადა.

მისივე თქმით, არახალია, რომ როდესაც ხელისუფლება კარგავს რეიტინგს, ის იწყებს ძალადობრივი მეთოდების გამოყენებას.

ამასთან, ჭიჭინაძემ აღნიშნა, რომ „ქართული ოცნება“ გავსებულია „ნაციონალური მოძრაობის“ წევრებით.

„ხალხი, რომელიც იბრძოდა უსამართლობის წინააღმდეგ 2012 წელს, დღეს ისევ ის ხალხი იბრძვის 2012 წლის ღირებულებების დასაცავად და „ქართული ოცნება“ პრაქტიკულად გავსებულია „ნაციონალური მოძრაობის“ იმ ხალხით, რომელსაც ჯოხის და ქვის მეტი არაფერი უნახავს ცხოვრებაში. აქედან გამოსავალი არის იმაში, რომ 2020 წლის 31 ოქტომბერს უნდა გაკეთდეს შესაბამისი არჩევანი, რომ ამ ქვეყანაში „ქართული ოცნების“ ხელისუფლება რეალურად უნდა დასრულდეს“, - განაცხადა დავით ჭიჭინაძემ.