დიდი ბრიტანეთის ხელისუფლებამ ბელარუსის პრეზიდენტ ალექსანდრე ლუკაშენკოს, მის შვილს და კიდევ რამდენიმე ბელარუს მაღალჩინოსანს სანქციები დაუწესა. ამის შესახებ ბრიტანეთის საგარეო საქმეთა სამინისტროს განცხადებაშია ნათქვამი.

უწყების ცნობით, სანქციები კანადასთან კოორდინაციით დაწესდა და მანაც მსგავსი სანქციები აამოქმედა. სამინისტროს განცხადების თანახმად, ალექსანდრე ლუკაშენკოს რეჟიმი არჩევნების გაყალბების შემდეგ, პასუხისმგებელია „ოპოზიციონერი პირების, მედიისა და ბელარუსი ხალხის წინააღმდეგ ჩადენილი ადამიანის უფლებების დარღვევის ფაქტებზე“.

მათივე პოზიციით, საერთაშორისო საზოგადოების მხრიდან მიუხედავად მრავალგზის მოწოდებებისა, ლუკაშენკო უარს აცხადებს ოპოზიციასთან დიალოგში ჩართვაზე და ამის ნაცვლად ირჩევს ძალადობრივი რეპრესიების გაძლიერებას.

„ახალი სანქციები გულისხმობს მოგზაურობაზე აკრძალვასა და ანგარიშების გაყინვას ბელარუსის რეჟიმის 8 წარმომადგენლისთვის, მათ შორის არის ალექსანდრე ლუკაშენკო, მისი შვილი ვიქტორი და ასევე პრეზიდენტის ადმინისტრაციის უფროსი იგორ სერგეენკო“, - ნათქვამია საგარეო უწყების განცხადებაში. სანქციებთან დაკავშირებით დიდი ბრიტანეთის საგარეო საქმეთა მინისტრმა დომინიკ რააბმა აღნიშნა, რომ მისი ქვეყნისა და კანადის მიერ გამოცემული სანქციები ლუკაშენკოს „ძალადობრივი და თაღლითური“ რეჟიმისთვის მკაფიო მესიჯია. „ჩვენ არ ვიღებთ ამ გაყალბებული არჩევნების შედეგებს“, - აღნიშნა რააბმა.

სანქციების ჩამონათვალში მოხვედრილი მაღალჩინოსნების უმეტესობა ძალოვანი უწყებების წარმომაადგენლები არიან.