კულტურის სფეროს წარმომადგენლები გიორგი გახარიას და მიხეილ ჩხენკელს ღია წერილით მიმართავენ

კულტურის სფეროს წარმომადგენლები საქართველოს პრემიერ-მინისტრს, გიორგი გახარიასა და განათლების, მეცნიერების, კულტურისა და სპორტის მინისტრს მიხეილ ჩხენკელს ოფიციალური წერილით მიმართავენ.

წერილის ავტორები გიორგი გახარიასა და მიხეილ ჩხენკელს თელავის ისტორიული მუზეუმიდან გათავისუფლებული თანამშრომლების, ნანა ვახვახიშვილისა და ლია სოზაშვილის სამსახურში აღდგენას სთხოვენ.

„მოგმართავთ თელავის ისტორიული მუზეუმის ღვაწლმოსილი თანამშრომლების, ნანა ვახვახიშვილისა და ლია სოზაშვილის გამო. ნანა ვახვახიშვილი და ლია სოზაშვილი თელავის ისტორიული მუზეუმში მუშაობდნენ რამდენიმე ათეული წლის მანძილზე, ქალბატონი ნანა - მუზეუმის გამოცემების სამეცნიერო-საგანმანათლებლო განყოფილების გამოცემების კურატორად, ხოლო ქალბატონი ლია - მუზეუმის სწავლულ მდივნად და სამეცნიერო-საგანმანათლებლო პროგრამების კურატორად. მათ სახელებთან არის დაკავშირებული თელავის ისტორიული მუზეუმის საქმიანობის პოპულარიზაცია, თელავის ისტორიისა და განაშენიანების შესახებ წიგნებისა და ბროშურების გამოცემა, თემატური გამოფენების ორგანიზება, ვასილ ბარნოვის, იოსებ იმედაშვილის, ვასილ როინაშვილის, სერგო ასლანიშვილის, დავით და რომანოზ გველესიანებისა და თელავში მოღვაწე სხვა გამოჩენილი ადამიანების შემოქმედების შესწავლა და მოსახლეობისათვის გაცნობა.

2019 წელს ნანა ვახვახიშვილი და ლია სოზაშვილი მუზეუმში განსახორციელებელი რეორგანიზაციული ცვლილებების საბაბით გაათავისუფლეს სამსახურიდან. როგორც შემდგომში აღმოჩნდა, მათ მიერ დაკავებულ თანამდებობებზე მუზეუმში რეალურად არ მომხდარა რეორგანიზაცია და ის ატარებდა მხოლოდ ფორმალურ ხასიათს, რადგან გაუქმებული შტატების ნაცვლად, შემოიღეს ახალი სტრუქტურული ერთეულები, რომლებიც შინაარსობრივად იმავე ფუნქციებით არის აღჭურვილი, როგორც ძველი სტრუქტურული ერთეულები.

მიგვაჩნია, რომ ღირსეული და დამსახურებული ადამიანების გამოგონილი საბაბით სამსახურიდან დათხოვნა არასწორია, როგორც სამართლებრივი ისე მორალური თვალსაზრისით და უსამართლობის განცდას ქმნის საზოგადოებაში.

აქვე აღვნიშნავთ, რომ ქალბატონი ნანა ვახვახიშვილი არის ერეკლე II-ის პირდაპირი შთამომავალი და მისი უსაფუძვლო დათხოვნა ერეკლე II-ის მუზეუმიდან, ყველაფერს რომ თავი დავანებოთ, ჩვენი ისტორიისადმი უპატივცემულობაცაა.

გთხოვთ, თქვენი უფლებამოსილების ფარგლებში შეისწავლოთ შექმნილი ვითარება და შესაბამის სამსახურებს დაავალოთ გადაწყვეტილების მიღება ნანა ვახვახიშვილისა და ლია სოზაშვილის სამსახურში აღდგენის თაობაზე“, - ნათქვამია მიმართვაში, რომელსაც ხელს აწერს ფილოლოგი, ენათმეცნიერი, საქართველოს ეროვნული აკადემიის წევრი მზექალა შანიძე; კინორეჟისორი, საქართველოს სახალხო არტისტი ელდარ შენგელაია; მომღერალი, ლოტბარი, საქართველოს სახალხო არტისტი ანზორ ერქომაიშვილი; ისტორიის მეცნიერებათა დოქტორი, პროფესორი გიორგი ოთხმეზური და კინორეჟისორი, პროფესორი რამაზ (ბუბა) ხოტივარი.

პაველ ფელგენგაუერი - ისრაელ-პალესტინის ზავის პირობები დამოკიდებული იქნება იმაზე, ისრაელი ღაზის სექტორს „ჰამასისაგან“ სრულად გაწმენდს და მოისურვებს თუ არა ამჯერად მასზე კონტროლის აბასის ადმინისტრაციისთვის გადაცემას
ქართული პრესის მიმოხილვა 14.05.2021
იაგო კაჭკაჭიშვილი - პოლიტიკური პროექტი, რომლის მიზანია „ქართულმა ოცნებამ“ ადგილობრივ არჩევნებში ამომრჩეველთა ხმების 43% არ აიღოს, რეალისტურია
სუპერმარკეტების ქსელ „მაგნიტის“ წამახალისებელ გათამაშებაში სუპერ პრიზი - ბინა გათამაშდა
კარაგანდაში შპს „ქაზ კარბონის“კუთვნილი ახალი ნახშირის გამამდიდრებელი ფაბრიკა გაიხსნა
თბილისში ქართულ-ფრანგული საკონდიტროების ქსელ Bisues-ის პირველი მაღაზია გაიხსნა