არჩევნებში კეთილსინდისიერი მონაწილეობისათვის ტრანსატლანტიკური კომისიის წევრმა, ესტონეთის ყოფილმა პრეზიდენტმა ტომას ჰენდრიკ ილვესმა ვირტუალურ პრესკონფერენციაზე, რომელზედაც არჩევნებში კეთილსინდისიერი მონაწილეობის შესახებ დათქმის პრეზენტაცია გაიმართა, არჩევნებში გარე ძალის ჩარევის საკითხზე და დეზინფორმაციის გავრცელებასთან დაკავშირებულ გამოწვევებზე ისაუბრა.

“ჩვენი მოვალეობაა, ჩვენი პასუხისმგებლობაა, რომ დემოკრატიული პროცესები და არჩევნები გარე ფაქტორებისგან თავისუფალი იყოს. როგორც ვხედავთ არჩევნებში უცხო ძალის ჩარევის საკითხი ძალიან სერიოზული საკითხია საქართველოსთვისაც. „ფეისბუქმა“ უამრავი ანგარიში წაშალა ე.წ. „კოორდინირებული არაავთენტური ქცევისთვის“. ეს არის „ტროლების“ ფაბრიკა თუ დეზინფორმაციის სხვა წყაროები, რომლებიც თქვენი ქვეყნის საშინაო პოლიტიკისთვის ზიანის მიყენებას ცდილობენ. მათი უმეტესობა სათავეს რუსეთიდან იღებს,“- აღნიშნა ტომას ჰენდრიკ ილვესმა.

მისივე თქმით, საზოგადოების ყალბი ინფორმაციისგან დასაცავად სამოქალაქო საზოგადოების ორგანიზაციების ჩართულობას დიდი მნიშვნელობა აქვს.

„მოვუწოდებ სამოქალაქო საზოგადოების ორგანიზაციებს, მისდიოს ამ ინფორმაციას, გაასაჯაროვოს, გამოააშკარავოს, ცრუ ინფორმაცია, რომ ქართველმა ამომრჩეველმა დაინახოს, რომ ეს ინფორმაცია ყალბია,“ - აღნიშნა ესტონეთის ყოფილმა პრეზიდენტმა.