საქართველომ ყველაფერი უნდა გააკეთოს, რომ სომხეთ-აზერბაიჯანის კონფლიქტის მშვიდობიან დარეგულირებას ხელი შეუწყოს, მაგრამ არ მგონია, რომ დღევანდელი ხელისუფლება ვინმესთვის საინტერესო იყოს ამ თვალსაზრისით, - ამის შესახებ "ნაციონალური მოძრაობის“ წევრმა სალომე სამადაშვილმა ჟურნალისტებთან პრემიერ-მინისტრ გიორგი გახარიას განცხადების კომენტირებისას აღნიშნა.

როგორც მან განაცხადა, გიორგი გახარია განცხადებას აკეთებს იმ ფონზე, როცა საქართველო-აზერბაიჯანის საზღვრის დემარკაციის საკითხზე გამოძიებაა დაწყებული, ამდენად მას არ ესმის რეგიონში შექმნილი ვითარების სირთულე.

„ცხადია, რომ ჩვენი ქვეყნის და სახელმწიფოს ინტერესებშია, რომ ჩვენმა მეზობლებმა, რაც შეიძლება სწრაფად შეწყვიტონ საომარი მოქმედებები და მოლაპარაკებების მაგიდას დაუბრუნდნენ. საქართველო ისტორიულად ყოველთვის ცდილობდა, რომ შუამავლის როლი ეთამაშა ამ კონფლიქტში. თუმცა, ეს განცხადება იმ ხელისუფლების წარმომადგენლისგან, რომელიც დღეს რეგიონში შექმნილ უმძიმეს ფონზე საუბრობს, აზერბაიჯანთან მიმდინარე მოლაპარაკებების თაობაზე, საგამოძიებო პროცესის თაობაზე, რა თქმა უნდა, ნაკლებ დამაჯერებელია, რომ ესმის ბატონ გახარიას ის სირთულე, რომელიც რეგიონშია შექმნილი უსაფრთხოების თვალსაზრისით“, - განაცხადა სამადაშვილმა.

ცნობისათვის, საქართველოს პრემიერ-მინისტრმა გიორგი გახარიამ აზერბაიჯანსა და სომხეთს შორის მიმდინარე სამხედრო კონფლიქტთან დაკავშირებით განცხადება გაავრცელა, სადაც განმარტავს, რომ საქართველო მზად არის, ნებისმიერი ფორმით შეუწყოს ხელი პროცესს, მათ შორის, დიალოგის გამართვის მიზნით, უმასპინძლოს კონფლიქტის მხარეების წარმომადგენელთა შეხვედრას თბილისში.