რელიგიის საკითხთა სახელმწიფო სააგენტომ 2020 წლის 20 იანვრის N1/216 რეკომენდაციით, საბჭოთა ტოტალიტარული რეჟიმის დროს მიყენებული ზიანის ნაწილობრივი ანაზღაურების უზრუნველყოფის მიზნით, რელიგიურ გაერთიანებებს 2020 წლის სახელმწიფო ბიუჯეტით განსაზღვრული 4 500 000 ლარი უკვე გაუნაწილა. ამის შესახებ ინფორმაციას რელიგიის საკითხთა სახელმწიფო სააგენტო ავრცელებს.

მათივე ცნობით, რელიგიის საკითხთა სახელმწიფო სააგენტომ საქართველოს ისლამურ თემს - 2 200 000 ლარი, საქართველოს სომეხთა სამოციქულო ქრისტიანულ თემს - 600 000 ლარი, საქართველოს რომაულ-კათოლიკეთა ქრისტიანულ თემს - 400 000 ლარი, საქართველოს იუდეურ თემს - 300 000 ლარი გადასცა.

როგორც რელიგიის საკითხთა სააგენტოში აცხადებენ, რელიგიურ გაერთიანებებთან კონსულტაციის, ფაქტობრივი გარემოებებისა და ობიექტური მაჩვენებლების (მრევლის რაოდენობა, სასულიერო პირების რაოდენობა და საკულტო შენობა-ნაგებობების რაოდენობა) გათვალისწინებით, რელიგიის საკითხთა სახელმწიფო სააგენტომ, 2020 წლის 28 სექტემბრის N1/874 რეკომენდაციით, მიიღო გადაწყვეტილება, 2020 წლისთვის დარჩენილი 1 000 000 ლარი არადისკრიმინაციული და სამართლიანი პროპორციულობით, შემდეგი ოდენობით გადანაწილდეს:

1. საქართველოს ისლამური თემი - 550 000 ლარი;
2. საქართველოს სომეხთა სამოციქულო ქრისტიანული თემი - 200 000
3. საქართველოს რომაულ-კათოლიკეთა ქრისტიანული თემი - 150 000 ლარი;
4. საქართველოს იუდეური თემი - 100 000 ლარი.

სულ, 2020 წლის განმავლობაში, რელიგიურ ორგანიზაციებზე ბიუჯეტით განსაზღვრული თანხები ასე გადანაწილდა:

1. საქართველოს ისლამურ თემს - 2 750 000 ლარი;
2. საქართველოს სომეხთა სამოციქულო ქრისტიანულ თემს - 800 000 ლარი;
3. საქართველოს რომაულ-კათოლიკეთა ქრისტიანულ თემს - 550 000 ლარი;
4. საქართველოს იუდეურ თემს - 400 000 ლარი.