უფრო მეტ ყურადღებას ვიჩენთ იმერეთის რეგიონის მიმართ, სადაც დღეს დაგვფიქსირდა 96 ახალი შემთხვევა. ასევე, განსაკუთრებული სიფრთხილით ვეკიდებით თბილისში ფართომასშტაბიანი პრევენციული ღონისძიებების გატარებას, - ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ქვეყანაში არსებულ ეპიდემიოლოგიურ სიტუაციაზე საუბრისას განაცხადა.

მისივე თქმით, კორონავირუსის გავრცელების კუთხით, ცხელ წერტილად კვლავ აჭარის რეგიონი რჩება.

„კვლავ ცხელ წერტილად რჩება აჭარა, ადგილობრივი ხელისუფლების მხრიდან ეპიდსაწინააღმდეგო ღონისძიებებთან დაკავშირებით სერიოზული მხარდაჭერაა. აჭარაში დროებით იმყოფება პაატა იმნაძე და ეპიდემიოლოგების დიდი ჯგუფი, რომლებიც ეხმარებიან აჭარას PCR ტესტირებაში 2 ლაბორატორიის ბაზაზე და ასევე, აქტიურად არიან ჩართული ეპიდსაწინააღმდეგო ღონისძიებების გატარებაში. უფრო მეტ ყურადღებას ვიჩენთ იმერეთის რეგიონის მიმართ სადაც დღეს დაგვფიქსირდა 96 ახალი შემთხვევა. ასევე, განსაკუთრებული სიფრთხილით ვეკიდებით თბილისში ფართომასშტაბიანი პრევენციული ღონისძიებების გატარებას“, - აღნიშნა ამირან გამყრელიძემ.

დაავადებათა კონტროლის ცენტრის ხელმძღვანელმა ჩატარებული ტესტირებების რაოდენობაზეც ისაუბრა. მისი ინფორმაციით, 1 მილიონ მოსახლეზე ჩატარებული ტესტირებების რაოდენობა ევროკავშირის შუალედური მაჩვენებელია.

„ქვეყანაში ჩატარებულია 650 000-მდე PCR ტესტირება, ამას ემატება, 340 000-მდე სწრაფი ტესტი. 1 მილიონ მოსახლეზე ჩვენი PCR ტესტირება არის 174 000, რაც ევროკავშირის შუალედური მაჩვენებელია“, - განაცხადა ამირან გამყრელიძემ.