ევროკავშირის ლიდერები ბელარუსისთვის სანქციების დაწესებაზე შეთანხმდნენ. „გადავწყვიტეთ, სანქციების დაწესება. მნიშვნელოვანია განვახორციელოთ ის, რაზეც რამდენიმე კვირის წინ შევთანხმდით და ამ გზით გავაგზავნოთ მესიჯი იმის შესახებ, რომ ჩვენ სანდოები ვართ,“- განაცხადა ევროსაბჭოს პრეზიდენტმა შარლ მიშელმა ბრიუსელში გამართული სამიტის შემდეგ.

სანქციების დაწესების საკითხზე შეთანხმების მიღწევას გერმანიის კანცლერი ანგელა მერკელიც მიესალმა და აღნიშნა, რომ ლუკაშენკოს მხარდამჭერების წინააღმდეგ სანქციების დაწესება „ძალიან მნიშვნელოვანი სიგნალია.“

ბელარუსის ოფიციალური პირების წინააღმდეგ სანქციების დაწესების გადაწყვეტილება ევროკავშირის ლიდერებმა ჯერ კიდევ აგვისტოში მიიღეს, თუმცა კვიპროსის პოზიციის გამო, რომელიც სანაცვლოდ თურქეთისთვის სანქციების დაწესებას ითხოვდა, შეთანხმების მიღწევა ამ დრომდე ვერ ხერხდებოდა. წუხელ გამართული სამიტის დროს ევროკავშირმა ანკარა შესაძლო სანქციების შესახებ გააფრთხილა და მოუწოდა, აღმოსავლეთ ხმელთაშუა ზღვისპირეთში „პროვოკაციები და ზეწოლა“ შეწყვიტოს, რის შემდეგაც კვიპროსი ბელარუსისთვის სანქციების დაწესებას დათანხმდა.