„ევროპული საქართველოს“ ლიდერი, დავით ბაქრაძე, ხელვაჩაურის რაიონის სოფელი ზედა ჯოჭოში იმყოფებოდა, სადაც ძლიერ სტიქიასა და მეწყერს მსხვერპლი მოჰყვა.
დავით ბაქრაძემ დაღუპულთა ოჯახის წევრებს, ნათესავებსა და ახლობლებს თანაგრძნობა გამოუცხადა. მისი თქმით, ეს არის უდიდესი ტრაგედია და მნიშვნელოვანია, რომ უზრუნველყოფილი იყოს ადამიანების უსაფრთხოება, რათა ტრაგედია სოფელში და სხვა სახლებში აღარ განმეორდეს.
„ძალიან მძიმე ტრაგედია დაატრიალა სტიქიამ გუშინ ამ სოფელში, 5 ადამიანი არის ამ სოფელში დაღუპული მეწყერის შედეგად და ახლაც მიმდინარეობს სამაშველო სამუშაოები და ეძებენ ადამიანებს. მაშველები მუშაობენ, ეძებენ ადამიანებს. ახლა, ამ ეტაპზე მთავარია, რომ ვუზრუნველყოთ ადამიანების უსაფრთხოება, რომ ასეთი რამ სოფელში და რომელიმე სხვა სახლში აღარ განმეორდეს და აღარ დატრიალდეს ასეთი ტრაგედია.
მინდა ღრმა მწუხარება გამოვთქვა და თანაგრძნობა გამოვუცხადო დაღუპულთა ოჯახის წევრებს, ნათესავებსა და ახლობლებს, ძალიან მძიმე ტრაგედიაა. უნდა მივხედოთ ახლა ადამიანებს, მათ, ვინც გადაურჩა ამ სტიქიას, რათა იგრძნონ ყურადღება და არ დარჩნენ ბედის ანაბარა“, - განაცხადა დავით ბაქრაძემ.