მგონია, რომ ზოგიერთები, არათუ კოალიციას შექმნიან, არათუ მხარდაჭერას გაზრდიან, იმის ნახევარ მხარდაჭერასაც ვერმიიღებენ, რაც დღევანდელ პარლამენტში აქვთ, - ამის შესახებ პარლამენტის თავმჯდომარე არჩილ თალაკვაძემ „პალიტრანიუსის“ გადაცემა „დღის ნიუსრუმში“ განაცხადა.

თალაკვაძის განმარტებით, თუ ოპოზიციურ პარტიებს კოალიციის შესაქმენლად საჭირო ხმების რაოდენობის მიღება შეუძლიათ, ამის შესაძლებლობა საკანონმდებლო დონეზე შექმნილია, დანარჩენი კი საქართველოს მოსახლეობის გადასაწყვეტი იქნება.

„თუ ოპოზიციას შეუძლია, რომ მიიღოს იმდენი ხმები, რომ მათ რაიმე კოალიცია შექმნან, ჩვენ ამის შესაძლებლობა შექმნილი გვაქვს. სისტემა, რომელიც ჩვენ შემოვიტანეთ, თავისთავად ყველა ოპოზიციურ პარტიას აძლევს საშუალებას, რომ მათ მაქსიმალური მხარდაჭერა მოაგროვონ. ვნახოთ, აქ არის ერთ თვეში არჩევნები. მე მგონია, რომ ზოგიერთები, არათუ კოალიციას შექმნიან, არათუ მხარდაჭერას გაზრდიან, იმის ნახევარ მხარდაჭერასაც ვერ მიიღებენ, რაც დღევანდელ პარლამენტში აქვთ და ამას თქვენ დაინახავთ. რაც შეეხება კოალიციის შექმნას - მეორე ტური, კოალიცია, მათ შორის, მყარი საპარლამენტო უმრავლესობა, რომელსაც, ჩვენ გვჯერა, რომ ავიღებთ, ეს არის დემოკრატიის ნაწილი, მაგრამ ამაზე გადაწყვეტილებას იღებს საზოგადოება და მოქალაქეები. ამიტომ, ჩვენ ვენდობით საზოგადოების არჩევანს,“- განაცხადა არჩილ თალაკვაძემ.