არასამთავრობო ორგანიზაციათა გაერთიანება „ერთად არჩევნებისთვის“ საუბნო საარჩევნო მონიტორინგის შესახებ განცხადებას ავრცელებს.

როგორც „ინტერპრესნიუსს“ გაერთიანებიდან აცნობეს, წყალტუბოს ოლქის ერთ-ერთი უბანი მათ დამკვირვებელს ღია, თუმცა, ცარიელი დახვდა. ასევე განცხადებაში აღნიშნულია, რომ უგულებელყოფილი იყო პანდემიის პირობებში გასატარებელი ღონისძიებებიც.

„გაერთიანება „ერთად არჩევნებისთვის“ დამკვირვებლები საუბნო საარჩევნო უბნების მონიტორინგს საქართველოს მასშტაბით აწარმოებენ. წყალტუბოს N-58 ოლქში, N-11 უბანზე, ჩვენს დამკვირვებელს საარჩევნო უბანი დახვდა ღია, თუმცა ადგილზე არ იმყოფებოდა პასუხისმგებელი პირი, დამკვირვებელმა მოიძია კომისიის წევრები, რომლებმაც განაცხადეს, რომ უბანი დროებით, პირადი ინიციატივით დატოვეს. უბანში შესვლის დროს დამკვირვებელს არ ჩაუტარდა თერმოსკრინინგი. აგრეთვე უგულებელყოფილ იქნა კოვიდ-19 პანდემიის პირობებში გასატარებელი სხვა ღონისძიებები.

დამკვირვებელმა მისცა მითითება, რომ შენობაში შესვლამდე აუცილებლად უნდა განხორციელდეს პირთა ჯანმრთელობის მდგომარეობის შემოწმების მიზნით თერმოსკრინინგი, დადგენილება N-24/2020 გათვალისწინებული შესაბამისი პროცედურები.

გაერთიანება „ერთად არჩევნებისთვის“ წარმომადგენლები მოუწოდებენ საქართველოს ცენტრალურ საარჩევნო კომისიას (ცესკოს) და ყველა საუბნო საარჩევნო კომიიის წევრებს შეასრულონ საკუთარი უფლებამოსილება, იყვნენ სამუშაო ადგილზე. ქვეყანაში შექმნილი მდგომარეობის გათვალისწინებით, მკაცრად დაიცვან კოვიდ-19-ის რეგულაციები,“- აღნიშნულია განცხადებაში.