„ევროპული საქართველოს“ მაჟორიტარობის კანდიდატი რუსთავსა და გარდაბანში, ირმა ნადირაშვილი სახელმწიფო ბიუჯეტის ახალ პროექტს ეხმაურება.

ნადირაშვილის განმარტებით, მაშინ როდესაც ქვეყანაში უმძიმესი ეკონომიკური კრიზისია და ადამიანები შიმშილობენ, „ქართული ოცნება“ ჩინოვნიკების ხელფასებს ზრდის და საჯარო სამსახურებში პარტიულ მუშაკებს ასაქმებს.

„ჯერჯერობით, გვაქვს ვითარება, როდესაც მთავრობის აბსოლუტურად უტვინო პოლიტიკის გამო, მათ შორის, კოვიდთან მიმართებაში, ეკონომიკა მიწასთან არის გასწორებული. ეკონომიკაში ძალიან დიდი მინუსი გვაქვს, ყოველდღიურად უკან-უკან მივდივართ და ხალხი ღარიბდება, ასეთი პროგნოზი, რომ იქნება 5%-იანი ზრდა, ეს არის ფანტასტიკის სფერო ჩვენი არაკომპეტენტური და უსინდისო ხელისუფლების პირობებში.

რაც შეეხება ბიუჯეტის ახალ პროექტს, სადაც ჩინოვნიკებისათვის ხელფასების ზრდა არის დაანონსებული, ძალიან კარგად გვესმის, რომ ეს წინასაარჩევნოდ სჭირდებათ ხმებისთვის, მაგრამ ეს არის უტიფრობა და უსინდისობა, როდესაც ქვეყანაში არის 800 000 ადამიანი, რომელსაც დღეში მხოლოდ 3-4 ლარის დახარჯვა შეუძლია საკუთარი შვილების გამოსაკვებად და ამ დროს ვიგებთ, რომ ეკონომიკის სამინისტრო და სხვა სამინისტროები ბიუჯეტს ზრდიან, ეს არის დამოკიდებულება „ქართული ოცნების“ მხრიდან საკუთარი მოქალაქეების მიმართ, მათ ფეხებზე კიდიათ საკუთარი მოქალაქეები“, - განაცხადა ირმა ნადირაშვილმა.