„სამოქალაქო პლატფორმა 20/20“ - მარნეულის ინციდენტის მონაწილეთა გირაოთი გათავისუფლება, წინასაარჩევნოდ, ძალადობას წაახალისებს

მარნეულის ინციდენტში მონაწილეთა 5000-ლარიანი გირაოთი გათავისუფლება წინასაარჩევნო პერიოდში ძალადობას კიდევ უფრო წაახალისებს, - ამის შესახებ დღეს გამართულ ბრიფინგზე „სამოქალაქო პლატფორმა 20/20“-ის რეგიონული ჯგუფის უფროსმა, მარნეულის ოლქის დამკვირვებელმა გიორგი მუმლაძემ განაცხადა. ინფორმაციას „სამოქალაქო პლატფორმა 20/20“ ავრცელებს.

მათი ცნობით, როგორც მუმლაძემ აღნიშნა, პროკურატურამ მოძალადეებისთვის 5000 ლარიანი გირაო მოითხოვა, რაც მოჩვენებით სამართალზე მიუთითებს.

„დასჯილია ღამის ინციდენტში მონაწილე მხოლოდ ორი პირი, თუმცა საქმეში არსებული ვიდეო მტკიცებულებებით და მოწმეთა ჩვენებებით დასტურდება, რომ დასაკავებელია მინიმუმ კიდევ ორი პირი - ლაშა ჩხიტუნიძე მარნეულის N89-ე საუბნო კომისიის მდივანი და შერმადინ ბოჭოიძე, მარნეულის საკრებულოს იურისტი,“- განაცხადა მუმლაძემ.

მარნეულის ოლქის დამკვირვებელი მომხდარზე პასუხისმგებლობას ცესკოს თავმჯდომარეს თამარ ჟვანიას აკისრებს.

„28 სექტემბერს, ცესკოს სხდომაზე თამარ ჟვანია გავაფრთხილე, რომ მარნეულში სიტუაცია იძაბებოდა, თუმცა ის სხდომიდან გაძევებით დამემუქრა. უშუალოდ თამარ ჟვანიას პასუხისმგებლობაა, რომ საარჩევნო ადმინისტრაციის წარმომადგენლები ქვედა დონეზე სხვადასხვა პარტიიდან ერთმანეთს ფიზიკურად გაუსწორდნენ“- აღნიშნა მუმლაძემ.

საარჩევნო ადმინისტრაციის პასუხისმგებლობაზე ისაუბრა დღეს გამართულ ბრიფინგზე „სამოქალაქო პლატფორმა 20/20“-ის სადამკვირვებლო მისიის დირექტორმა ლაშა ფარულავამაც.

მისი თქმით, ცესკო ვალდებულია, გააძლიეროს ზედამხედველობა ქვედა დონის საარჩევნო ადმინისტრაციაზე, წინააღმდეგ შემთხვევაში, 2020 წლის 31 ოქტომბრის საპარლამენტო არჩევნების დემოკრატიულ, თავისუფალ და მიუკერძოებელ გარემოში ჩატარება კითხვის ნიშნის ქვეშ დადგება, რაც, საბოლოოდ, არჩევნების ლეგიტიმურობის საკითხს დააყენებს დღის წესრიგი.

ბრიფინგზე „სამოქალაქო პლატფორმა 20/20“-ის თავმჯდომარემ ვასო ურუშაძემ მადლობა გადაუხადა მედიას, ადგილობრივ და საერთაშორისო დამკვირვებლებს მხარდაჭერისთვის ორგანიზაციის დამკვირვებლის გიორგი მუმლაძის მიმართ მარნეულში განხორციელებული ძალადობის ფაქტის გამო და აღნიშნა, რომ არა მედიისა და პარტნიორების თანადგომა, ხელისუფლება მუმლაძეს დაზარალებულად არ ცნობდა და „სამოქალაქო პლატფორმა 20/20“-ს არ ექნებოდა შესაძლებლობა უშუალოდ გასცნობოდა საქმის მასალებს.

2020 წლის 29 სექტემბერს მარნეულში მომხდარი ინცინდენტის დროს, როცა „ქართული ოცნების“ აქტივისტები და ადგილობრივი მუნიციპალიტეტისა და საარჩევნო ადმინისტრაციის წარმომადგენლები ფიზიკურად გაუსწორდნენ ოპოზიციური პარტიის წარმომადგენლებს, გიორგი მუმლაძეს არ მიეცა საკუთარი უფლებამოსილების განხორციელების და მომხდარზე დაკვირვების შესაძლებლობა. მუმლაძეს თავს დაესხნენ და ფიზიკურად გაუსწორდნენ "ქართული ოცნების" აქტივისტები, მათ შორის, მარნეულის საკრებულოს თავმჯდომარე და „ქართული ოცნების“ ადგილობრივი შტაბის უფროსი ამირან გიორგაძე. მომხდარის გამო გიორგი მუმლაძე 4 ოქტომბერს პროკურატურამ დაზარალებულად სცნო.

ცნობისთვის, „სამოქალაქო პლატფორმა 20/20” ცესკოს მიერ რეგისტრირებულია როგორც ადგილობრივი სადამკვირვებლო ორგანიზაცია, რომელიც 2020 წლის 31 ოქტომბრის საპარლამენტო არჩევნებს და მიმდინარე საარჩევნო პროცესს აკვირდება.

ზურაბ ბატიაშვილი - ყარაბაღის კონფლიქტით ყველაზე მოგებული მხარე რუსეთია
ქართული პრესის მიმოხილვა 22.10.2020
რამაზ საყვარელიძე - იმ სოციოლოგიური კვლევების ფონზე, რაც მრავლად ტარდება, გაუგებარია, საიდან გაუჩნდა ოპოზიციას არჩევნებში გამარჯვების და მთავრობის შექმნის იმედი
3-მილიარდიანი ინვესტიცია დედაქალაქის ცენტრში - Tbilisi Hills Golf & Residences ინოვაციური განვითარების ხედვით
გიგანტური კერამიკული ფილები (R)
სამსუნგის The Serif ტელევიზორი საქართველოში უკვე იყიდება
მოიპოვე მსოფლიოში ყველაზე მოთხოვნადი მინერალები საქართველოში
eutoday - ყარაბაღის კონფლიქტი - ბრძოლა საერთაშორისო სამართლისთვის და არა რელიგიისთვის
კახა ძაგანია - "პატრიოტთა ალიანსმა" ხელისუფლებისგან ხმის მიცემის საათების გაზრდა მოითხოვა"
მერაბ ჭიქაშვილი - "ხელისუფლება კორონას ფსიქოლოგიურ იარაღად იყენებს!"
ნანა დევდარიანი - "31 ოქტომბერს ხალხი "ნაციონალურ მოძრაობასაც" და "ქართულ ოცნებასაც" ყველაფრისთვის  დასჯის!"