თბილისის მერიასთან აქციაზე დაკავებული „სტრატეგია აღმაშენებლის“ 4 წევრი გათავისუფლდა, - ამის შესახებ ჟურნალისტებს პარტიის ლიდერმა გიორგი ვაშაძემ განუცხადა.

მისივე თქმით, დაკავებულებს შორის არის ერთი არასრულწლოვანი და ასევე, პარტიის საარჩევნო სიაში მყოფი პაატა მანჯგალაძე.

„წავუყენე ულტიმატუმი - ან გაათავისუფლებდნენ, ან დაიწყებოდა ფართომასშტაბიანი აქცია, გადაიკეტებოდა გზები“,- განაცხადა ვაშაძემ.

ცნობისთვის, დღეს თბილისის მერიასთან აქციაზე სამართალდამცავებმა „სტრატეგია აღმაშენებელის“ ოთხი წევრი დააკავეს. შსს-ს ცნობით, აქციის მონაწილეები ზოგადი ადმინისტრაციული კოდექსის 173-ე მუხლით არიან დაკავებულები, რაც სამართალდამცავი ორგანოს მუშაკის ან სამხედრო მოსამსახურის და სახელმწიფო დაცვის სპეციალური სამსახურის თანამშრომლის კანონიერი განკარგულებისადმი ან მოთხოვნისადმი დაუმორჩილებლობას გულისხმობს.

„სტრატეგია აღმაშენებლის“ წარმომადგენლები პლაკატების გაკვრის გამო მათი პარტიის წევრების დაჯარიმებას აპროტესტებენ და ჯარიმების ჩამოწერას მოითხოვენ.