თენგო თევზაძე - „სამოქალაქო პლატფორმა 20/20“-მა წინასაარჩევნო კამპანიაში მასწავლებლების მობილიზების ფაქტები დააფიქსირა

„სამოქალაქო პლატფორმა 20/20“-მა წინასაარჩევნო კამპანიაში პარტიულ ღონისძიებებზე მასწავლებლების მობილიზების ფაქტები დააფიქსირა, რაც მოქმედი კანონმდებლობის აკრძალულია. აღნიშნულის შესახებ „ინტერპრესნიუსს“ ორგანიზაციის პრესსამსახურიდან აცნობეს.

როგორც „სამოქალაქო პლატფორმა 20/20“-ის აღმასრულებელმა დირექტორმა, თენგო თევზაძემ განმარტა, 2020 წლის წინასაარჩევნო პერიოდში მასობრივი ხასიათი მიიღო სახელმწიფო ბიუჯეტიდან დაფინანსებული ორგანიზაციების თანამშრომლების, მათ შორის, მასწავლებლების პარტიულ ღონისძიებებზე მობილიზებამ.

„ხშირ შემთხვევაში სხვადასხვა სკოლის მასწავლებლების მობილიზება ხდება მაჟორიტარებთან შეხვედრის მიზნით, მათ შორის, სამუშაო საათებში. აღნიშნულ ფაქტებს, რომელიც ა(ა)ი.პ „სამოქალაქო პლატფორმა 20/20“ იკვლევს, ხშირ შემთხვევაში, ორგანიზებული ხასიათი აქვს, რომელსაც ორგანიზებას პოლიტიკური პარტია „ქართული ოცნების“ წარმომადგენლები და სკოლების დირექტორები უწევენ,“- განაცხადა თევზაძემ.

მისი თქმით, საარჩევნო კანონმდებლობის შესაბამისად, აკრძალულია სამსახურებრივად დაქვემდებარებული ან სხვაგვარად დამოკიდებული პირის ჩაბმა ისეთ საქმიანობაში, რომელიც ხელს უწყობს კანდიდატის წარდგენას ან/და არჩევას (საქართველოს საარჩევნო კოდექსი, მუხლი 49 (1) ა)

„ჩვენი ორგანიზაცია აგრძელებს, ბოლნისის, თბილისის, გურიის და წყალტუბოს ფაქტების შესწავლას და შესაძლო დარღვევების შესახებ მიმართავს ცენტრალურ საარჩევნო კომისიას და საქართველოს განათლების სამინისტროს. ეს უკანასკნელი მეტი პასუხისმგებლობით უნდა მოეკიდოს აღნიშნული ფაქტების პრევენციას და მიიღოს შესაბამისი გადაწყვეტილებები“, - განმარტა თევზაძემ.

მათივე ცნობით, “სამოქალაქო პლატფორმა 20/20” ცესკოს მიერ რეგისტრირებულია როგორც ადგილობრივი სადამკვირვებლო ორგანიზაცია, რომელიც 2020 წლის 31 ოქტომბრის საპარლამენტო არჩევნებს და მიმდინარე საარჩევნო პროცესს აკვირდება.

ხათუნა ბურკაძე - კრემლის აგრესიული პოლიტიკის ფონზე აუცილებელია აშშ-საქართველოს სტრატეგიული პარტნიორობის ქარტიის განახლება
ქართული პრესის მიმოხილვა 06.12.2021
პაატა დავითაია - საკონსტიტუციო ცვლილებებთან დაკავშირებით „ქართული ოცნების“ და „ნაციონალური მოძრაობის“ ინტერესები ემთხვევა - ბარიერის დაწევა აუცილებელია ქართული დემოკრატიის განვითარებისთვის
Colliers MMS გაფართოებული საინვესტიციო პორტფელი და ახალი შეთავაზება სამშენებლო სექტორს
სამშენებლო კომპანია „მეგა ჰოლდინგი“ მეგა საახალწლო აქციას აანონსებს: ყველა ბინა საჩუქრით
შეიძინე ბინა წინასწარი შენატანის გარეშე - შეთავაზება „ტერასა გლდანი გრინ თაუერისგან“