სამგორის რაიონის მაჟორიტარი დეპუტატობის კანდიდატი, სოზარ სუბარი, აფრიკის ჩასახლებაში მცხოვრებ, ოკუპირებული ტერიტორიებიდან იძულებით გადაადგილებულ პირებს შეხვდა.

„ქართული ოცნების“ ინფორმაციით, შეხვედრაზე, სოზარ სუბარმა დევნილებს საკუთარი სამოქმედო გეგმა გააცნო და მოისმინა მათი პრობლემები.

„დევნილებმა ძირითად პრობლემად, უკვე დაკანონებული შენობების მიმდებარე ტერიტორიების კეთილმოწყობა, საბავშვო ბაღის მშენებლობა და გარე განათების მონტაჟი დაასახელეს. მაჟორიტარი დეპუტატობის კანდიდატი მოსახლეობას დაჰპირდა, რომ მაქსიმალურად მოკლე დროში შეეცდება აღნიშნული პრობლემების მოგვარებას.

როგორც სოზარ სუბარმა აღნიშნა, მხოლოდ 2020 წელს, ჯამში, ახალ საცხოვრებელს 2000-ზე მეტი იძულებით გადაადგილებული ოჯახი მიიღებს. ბოლო 8 წლის განმავლობაში კი, საქართველოს მასშტაბით, სხვადასხვა პროგრამების ფარგლებში 21 655 დევნილი ოჯახი განსახლდა“ ,- ნათქვამია პარტიის მიერ გავრცელებულ ინფორმაციაში.