ეკატერინე ტიკარაძის განმარტებით, ტერმინი „თანმხლები დაავადება“ მსოფლიოს სხვა ქვეყნებშიც გამოიყენება, როცა პაციენტს კორონავირუსთან ერთად სხვა დაავადებებიც აღენიშნება
ჯანდაცვის მინისტრის ეკატერინე ტიკარაძის განმარტებით, ტერმინი „თანმხლები დაავადება“ არა მხოლოდ საქართველოში, არამედ მსოფლიოს ხვა ქვეყნებშიც გამოიყენება იმ დროს, როდესაც პაციენტს კორონავირუსთან ერთად, სხვა დაავადებებიც აღენიშნება.
როგორც მან დღევანდელ ბრიფინგზე აღნიშნა, ჯანდაცვის სფეროს სპეციალისტები ეთიკას არ არღვევენ და ცდილობენ, საზოგადოებას და მედიას სრულყოფილი ინფორმაცია მიაწოდონ, რათა შემდეგში ინფორმაციული ვაკუუმი არ შეიქმნას.
„რაც შეეხება პაციენტების თანხმლებ დაავადებებს, ეს ტერმინოლოგია არა მხოლოდ საქართველოში, არამედ მსოფლიოს სხვა ქვეყნებშიც გამოიყენება, როდესაც პაციენტი იღუპება კორონავირუსთან ერთად თანმხლები დაავადებების გართულებიდან გამომდინარე და კოვიდ 19-ს არ ასახელებენ ძირითად მიზეზად. ამ შემთხვევაში, ჩვენც ეთიკის ნორმებს არანიარად არ ვარღვევთ, უბრალოდ, საზოგადოებისა და მედიის მაღალი ინტერესიდან გამომდინარე, ვცდილობთ, არ ჩავკეტოთ ინფორმაცია, რომ შემდეგ უკვე არ დაგვბრალდეს გარკვეული ინფორმაციული ვაკუუმის შექმნა“,-განაცხადა ტიკარაძემ.
