გარემოს ეროვნულ სააგენტოს ამერიკის შეერთებულმა შტატებმა საჩუქრად თანამედროვე მეტეოროლოგიური რადარი გადასცა. ამის შესახებ ინფორმაციას გარემოს ეროვნული სააგენტო ავრცელებს.
მათივე ინფორმაციით, რადარი საშუალებას იძლევა, 250 კმ-ის რადიუსში, ოპერატიულ რეჟიმში გადმოსცეს მონაცემები ღრუბელთა ტიპების, მათი ინტენსივობის, გადაადგილების, მიმართულების, სიჩქარის და სხვა ფიზიკური პარამეტრების შესახებ.
„რადარის მომწოდებელია მსოფლიოს ერთ-ერთი ლიდერი ფინური კომპანია „VAISALA“. რადარი დასავლეთ საქართველოში, ქ. ქუთაისის მიმდებარედ დამონტაჟდა და ექსპლოატაციაში უახლოეს პერიოდში შევა. გარემოს დაცვისა და სოფლის მეურნეობის სამინისტროს გარემოს ეროვნული სააგენტოს სპეციალისტებისთვის ფინური კომპანიის „VAISALA“ წარმომადგენლებმა მეტეოროლოგიური რადარის ტექნიკური მომსახურების შესახებ თბილისსა და ქუთაისში ტრენინგები გამართეს.
აღნიშნული რადარი შესაძლებლობას იძლევა დასავლეთ საქართველოს თითქმის მთელ ტერიტორიაზე დადგინდეს მოსალოდნელი ნალექების რაოდენობა და ინტენსივობა, რაც უზრუნველყოფს მათგან გამოწვეული წყალმოვარდნების და ღვარცოფების შესახებ ინფორმაციის შესაბამისი უწყებებისთვის დროულად მიწოდებას“, - ნათქვამია ინფორმაციაში.