მარტივი მათემატიკაა, რომელიც თქვენ, საქართველოს მოქალაქეებმა შექმენით, ვერც „ქართული ოცნება“ და ვერც „ნაციონალური მოძრაობა“ 51%-ზე მეტს ვერ იღებს და ეს იყო სწორი ვერდიქტი, თქვენვე შეიყვანთ პარლამენტში რამდენიმე პატარა პარტიას, - ამის შესახებ საქართველოს ყოფილმა პრეზიდენტმა, გიორგი მარგველაშვილმა ტელეკომპანია „პალიტრანიუსის“ გადაცემა „360 გრადუსში“ განაცხადა.
მისი თქმით, ამომრჩევლებმა ახალ პოლიტიკურ ძალებს უნდა დაუჭირონ მხარი და არა „ქართულ ოცნებას“ და „ნაციონალურ მოძრაობას“.
„ქვეყანაში პოლიტიკური სურათი მივიღეთ, რომ მმართველი პარტია არა ამომრჩეველს, არამედ ოპონენტს ელაპარაკება. მმართველი პარტიის ლიდერი არა ამომრჩეველს, არამედ ოპონენტი პარტიის ლიდერს ესაუბრება. შენ რომ ეუბნები, რომ მშია, დასაქმება მჭირდება, ჯანდაცვის პრობლემა მაქვს, გპასუხობს, რომ „ნაციონალურ მოძრაობასთან“ მაქვს გასარჩევი და თუ გაბრაზებით ეტყვი, რომ მშია, მაშინ „ნაცი“ ხარ. ამ რეალობიდან გამოსვლაა, რომ ისეთ პოლიტიკურ ძალას მისცე ხმა, რომელსაც არ ექნება ისეთი მხარდაჭერა, რომ შენი ხმა არ ადარდებდეს. პატარა პოლიტიკური ძალები დამოკიდებულნი არიან ერთეულ ამომრჩეველზე. არ შეიძლება საქართველო ამ ორ პოლუსს შორის იყოს ჩაკეტილი“, - აღნიშნა მარგველაშვილმა.