სახელმწიფო მინისტრის თეა ახვლედიანის განცხადებით, ჟენევის მოლაპარაკებების ჩაშლა სამშვიდობო პროცესს საფრთხის ქვეშ აყენებს. როგორც მან ჟურნალისტებს განუცხადა, მოლაპარაკებების ჩაშლა ოკუპირებულ ტერიტორიებზე გამწვავებული მდგომარეობის ფონზე კიდევ უფრო მიუღებელია.
“საქართველოს ოკუპირებულ ტერიტორიებზე გამწვავებული უსაფრთხოების, ადამიანის უფლებრივი და ჰუმანიტარული მდგომარეობის ფონზე განსაკუთრებით მიუღებელია რუსეთის ფედერაციის მიერ მიღებული გადაწყვეტილება, რამაც გამოიწვია ჟენევის მოლაპარაკებების მორიგი რაუნდის ჩაშლა. ბუნებრივია, ეს არის ძალიან ნეგატიური ქმედება, რომელიც საფრთხის ქვეშ აყენებს ზოგადად სამშვიდობო პროცესს, ისევე როგორც საქართველოს ხელისუფლების და საერთაშორისო პარტნიორების ერთობლივ ძალისხმევას, რომელიც მიმართულია ომით დაზარალებული მოსახლეობის კიდევ უფრო დამძიმებული გამოწვევების დასაძლევად. ნამდვილად მაქვს იმედი, რომ რუსეთი დაუბრუნდება მოლაპარაკებების მაგიდას. ეს არის უმნიშვნელოვანესი, ერთადერთი საერთაშორისო ფორმატი, სადაც საქართველო და რუსეთი მართავს პირდაპირ დიალოგს ომის შედეგად რუსეთის საერთაშორისოდ ნაკისრი ვალდებულებების აღსრულების თემაზე”,- განაცხადა ახვლედიანმა.
ცნობისთვის, საგარეო საქმეთა სამინისტროს ინფორმაციით, ჟენევის მოლაპარაკებების 51-ე რაუნდი, რომელიც 6-7 ოქტომბერს უნდა გამართულიყო, რუსეთის ფედერაციის გამო ჩაიშალა.