აზერბაიჯანსა და სომხეთს მოლაპარაკებების გასამართად საკუთარ ტერიტორიას კიდევ ერთი ქვეყანა სთავაზობს. ავსტრიის კანცლერმა ერევანსა და ბაქოს პირდაპირი მოლაპარაკებების გამართვა ვენაში შესთავაზა.
სებასტიან კურცი შეშფოთებულია მთიან ყარაბაღში მიმდინარე მოვლენებით, რომელიც ამ დრომდე გრძელდება და აცხადებს, რომ კონფლიქტი საომარი გზით არ წყდება. ის გამოდის ამ საომარი მოქმედებების შეწყვეტის მოთხოვნით და მხარს უჭერს ეუთოს მინსკის ჯგუფის ეგიდით მოლაპარაკებების გაგრძელებას.
„დღეს სომხეთის პრემიერ-მინისტრთან სატელეფონო საუბრისას მშვიდობიანი გადაწყვეტილების იმედი გამოვთქვი და დავადასტურე ჩვენი წინადადება, მხარეებს შორის მოლაპარაკებების მორიგი რაუნდის გამართვასთან დაკავშირებით. ავსტრია ყოველთვის იყო მოლაპარაკებათა ადგილი და კვლავაც დაჟინებით მოვითხოვთ დეესკალაციასა და პირდაპირ დიალოგს“, - დაწერა კურცმა „ტვიტერის“ გვერდზე.