ეს განცხადებები, რომელიც კეთდება, არის მხოლოდ და მხოლოდ ერთი მიზნით, რომ იქნებ როგორმე წაახალისონ თავისი მომხრეები და არ დაკარგონ მათ ბრძოლისუნარიანობა,- ასე გამოეხმაურა პარტიის “ლელო საქართველოსთვის” ერთ-ერთი ლიდერი, ბადრი ჯაფარიძე “ქართული ოცნების” თავმჯდომარის, ბიძინა ივანიშვილის განცხადებას იმასთან დაკავშირებით, რომ “ქართული ოცნების” რეიტინგი 63%-ს აღწევს.

ჯაფარიძის შეფასებით, “ქართული ოცნება” უნდა მოემზადოს, რომ ხელისუფლება ახლად არჩეულ პოლიტიკურ ძალას გადააბაროს.

“ამ ხელისუფლების პრობლემა, პირველი დღიდან არის მისი არაადეკვატურობა. ეს განცხადებაც ამაზე მიუთითებს. ცხადია, რომ ამ არჩევნებში ხელისუფლება მარცხდება. მთავარია, რომ ეს პროცესი მშვიდად წარვმართოთ და მაქსიმალურად ავირიდოთ ყველანაირი ექსცესი. ეს განცხადებები, რომელიც კეთდება, არის მხოლოდ და მხოლოდ ერთი მიზნით, რომ იქნებ როგორმე წაახალისონ თავისი მომხრეები და არ დაკარგონ მათ ბრძოლისუნარიანობა. რეალურად “ქართული ოცნება” უნდა მოემაზადოს, რომ ხელისუფლება გადააბაროს ახლად არჩეულ პოლიტიკურ ძალას”,- განაცხადა ჯაფარიძემ.

ცნობისთვის, „ქართული ოცნება -დემოკრატიული საქართველოს“ თავმჯდომარის, ბიძინა ივანიშვილის განცხადებით, "ქართული ოცნება" დამაჯერებლად იმარჯვებს ამ არჩევნებში. ივანიშვილის თქმით, ყველა კვლევა ადასტურებს, რომ პარტიის საპროგნოზო მაჩვენებელი 54-დან 60%-მდე მერყეობს და რიგ შემთხვევებში, 63%-საც კი აჭარბებს.