„ოპოზიციური პარტიების რეცეპტები სასამართლოს თაობაზე, არასრული და არასაკმარისია”, - ამის შესახებ პოლიტოლოგმა ლევან ბოძაშვილმა განაცხადა, რითაც გამოეხმაურა ოპოზიციური პოლიტიკური პარტიების მიერ სასამართლო სისტემის რეფორმების შესახებ კონცეფციის გაფორმებას.

ბოძაშვილის თქმით, პოლიტიკურ პარტიებს არ აქვთ სრულფასოვანი სისტემური ხედვა სასამართლოს დამოუკიდებლობის გასაძლიერებლად.

„სამწუხაროა, რომ პოლიტიკურ პარტიებს არ აქვთ სრულფასოვანი სისტემური ხედვა სასამართლო სისტემის გაუმჯობესებისთვის, მისი დამოუკიდებლობის გასაძლიერებლად, სასამართლო პრაქტიკის გაევროპულების მიმართულებით და მხოლოდ მეორადი მნიშვნელობის სისტემური და სუბიექტური პრობლემების გადაწყვეტას გვთავაზობენ. ასევე, არ არის ხედვა სასამართლოს წარმოების დიჯიტალიზაციის თაობაზე. რაც ყველაზე მთავარია, არ გვთავაზობენ ერთგვაროვანი პრაქტიკის დამკვიდრების სისტემურ მექანიზმს. მაშინ, როდესაც საქართველო თანდათან ხდება ევროპული სამართლის სივრცის ნაწილი, არ არის წარმოდგენილი სასამართლო სისტემის ამ სივრცესთან პრაქტიკული შესაბამისობის უზრუნველყოფის მექანიზმი. ამიტომაც, რეალურად ეს რეცეპტები კოსმეტიკურია და არ წარმოადგენს მასშტაბურ სისტემურ ხედვას”, - განაცხადა ბოძაშვილმა.

ცნობისთვის, ოპოზიციურმა პოლიტიკურმა პარტიებმა ხელი მოაწერეს კონცეფციას - “სასამართლო სისტემის რეფორმორების პირველი 10 ნაბიჯი”.

დოკუმენტის მიხედვით, პარტიები თანხმდებიან საქართველოს მართლმსაჯულების სისტემის ინსტიტუციონალიზაციის, არაფორმალური გავლენებისგან გათავისუფლების, შიდადემოკრატიული წახალისებისა და უმაღლესი სტანდარტების დამკვიდრების აუცილებლობაზე.