რუსეთის, სომხეთისა და აზერბაიჯანის საგარეო საქმეთა მინისტრების მიერ ერთობლივი განცხადების გავრცელების შემდეგ სამხრეთის მიმართულებით უპილოტო საფრენი აპარატების გამოყენების სიხშირე გაიზარდა, - სომხური მედიის ინფორმაციით, ამის შესახებ სომხეთის თავდაცვის მინისტრის პრესსპიკერი შუშან სტეპანიანი სოციალურ ქსელ „ფეისბუქში“ წერს.
„თავდაცვის არმიის ნაწილებმა მტრის ყველა თავდასხმა მოიგერიეს, მის პირად შემადგენლობას დიდი ზარალი მიაყენეს და უპილოტო საფრენი აპარატები გაანადგურეს. მტერი ეშმაკურად ცდილობს, 10 ოქტომბრის 12:00 საათამდე, ჰუმანიტარული მიზნით ცეცხლის შეწყვეტამდე, სიტუაცია შეცვალოს“, - წერს სტეპანიანი.