ბოლო 48 საათის განმავლობაში კანარის კუნძულებზე, რომელიც ესპანეთის სამეფოს ეკუთვნის, ნავებით სულ მცირე 1 000 მიგრანტი ჩავიდა - ამ ინფორმაციას წითელი ჯვრის საერთაშორისო კომიტეტი ავრცელებს.

მათი თქმით, დროის მცირე მონაკვეთში ამდენი მიგრანტი კუნძულებზე რამდენიმე ათწლეულია არ მოხვედრილა. კომიტეტის ინფორმაციით, მიგრანტების უმეტესობა სენეგალიდან არიან და კანარის კუნძულებზე მოსახვედრად აფრიკის კონტინენტიდან ნავებით 1 600 კილომეტრზე მეტის გაცურვა მოუწიათ.

წითელი ჯვრის განცხადებით, რამდენიმე მიგრანტს ჰიპოთერმია ჰქონდა, რის გამოც ისინი საავადმყოფოში გადაიყვანეს.

საერთო ჯამში, წელს კანარის კუნძულებზე 3 200-ზე მეტი მიგრანტი ჩავიდა, რაც გასული წლის ანალოგიურ პერიოდს 600%-ით აღემატება.