საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის, განცხადებით, მთიან ყარაბაღში სამხედრო მოქმედებების გაგრძელების შესახებ გავრცელებული ინფორმაცია შემაშფოთებელია და ევროკავშირი არსებით მოლაპარაკებებში დაუყოვნებლივ უნდა ჩაერთოს.

„უკიდურესი შეშფოთებით აღვნიშნავთ ინფორმაციას სამხედრო მოქმედებების გაგრძელების, ისევე როგორც მშვიდობიან მოსახლეობაში მსხვერპლის არსებობის შესახებ,“- ნათქვამია ჯოზეფ ბორელის მიერ გავრცელებულ განცხადებაში.

მისივე თქმით, ევროკავშირის წევრი ქვეყნები არსებით მოლაპარაკებების პროცესში დაუყოვნებლივ უნდა ჩაერთონ, რომელიც ათობით წელია ეუთოს მინსკის ჯგუფის ეგიდით მიმდინარეობს.

შეგახსენებთ, ცეცხლის შეწყვეტის შესახებ შეთანხმება, რომელსაც სომხეთისა და აზერბაიჯანის საგარეო საქმეთა მინისტრებმა მოსკოვში მიაღწიეს, 10 ოქტომბრის 12:00 საათიდან მოქმედებს, თუმცა ცეცხლის შეწყვეტის გამოცხადებიდან რამდენიმე საათში მხარეებმა მის დარღვევაში ერთმანეთის დადანაშაულება დაიწყეს.