ინფექციური საავადმყოფოს ბოქსირებული განყოფილების ხელმძღვანელის, მარინა ენდელაძის განცხადებით, თბილისში დღეს დაფიქსირებული კორონავირუსის 178 ახალი შემთხვევა იმედისმომცემია, ვინაიდან ბოლო დღეებთან შედარებით, თბილისში ინფიცირების რაოდენობა შემცირდა.

ამასთან ენდელაძის თქმით, თუ მოსახლეობა თავს დაიცავს კორონავირუსით ინფიცირებისგან, თბილისში ინფიცირების შემთხვევების დრამატული მატება არ იქნება.

„დღეს ცოტა იმედისმომცემი ინფორმაცია გვქონდა, შედარებით ნაკლები იყო, ვიდრე გუშინ. ვფიქრობ, მოსახლეობის შეგნება ისეთია, რომ გავუფრთხილდებით ყველა კოვიდინფიცირებას, არ გვექნება თბილისში დრამატული ზრდა. ეს მოსახლეობაზეა დამოკიდებული“,-განაცხადა მარინა ენდელაძემ.

რაც შეეხება თბილისის ინფექციურ საავადმყოფოს, მარინა ენდელაძის თქმით, კლინიკაში 56 ინფიცირებული მკურნალობს, მათგან პაციენტების უმეტესობის ჯანმრთელობის მდგომარეობა საშუალო სიმძიმისაა.

ამასთან, მარინა ენდელაძე დასძენს, რომ კორონავირუსით გარდაცვლილების პროცენტული რაოდენობა საქართველოში მაღალი არ არის.

ცნობისთვის, საქართველოში კორონავირუსის 478 ახალი შემთხვევა გამოვლინდა და ინფიცირების შემთხვევათა რაოდენობა 12 272-მდე გაიზარდა.გარდა ამისა, საქართველოში, ბოლო 24 საათში კორონავირუსისგან კიდევ 211 პაციენტი გამოჯანმრთელდა. გამოჯანმრთელებულთა საერთო რაოდენობა ამ ეტაპზე 6538-ია.