ჯოზეფ ბორელი ყარაბაღის კონფლიქტზე - განვიხილეთ, რა შეიძლება გაკეთდეს, რომ ცეცხლის შეწყვეტის შეთანხმების პირობები შესრულდეს
ევროკავშირის წევრი ქვეყნების საგარეო საქმეთა მინისტრებმა მთიანი ყარაბაღის კონფლიქტი განიხილეს.
მინისტრების შეხვედრა დახურულ კარს მიღმა გაიმართა, რის შემდეგაც ევროკავშირის უმაღლესმა კომისარმა საგარეო საქმეთა და უსაფრთხოების პოლიტიკის საკითხებში, ჯოზეფ ბორელიმ მედიასთან პრესკონფერენცია გამართა.
„ჩვენ მოვისმინეთ საფრანგეთის საგარეო საქმეთა მინისტრის შეფასებები, ეუთო-ს მინსკის ჯგუფის თანათავმჯდომარეთა ჯგუფის ძალისხმევაზე საბრძოლო მოქმედებების შესაწყვეტად და მოლაპარაკების მაგიდასთან დასაბრუნებლად. ჩვენ ასევე განვიხილეთ თუ რა შეიძლება გაკეთდეს იმისთვის, რომ 10 ოქტომბერს მიღწეული ცეცხლის შეწყვეტის შეთანხმების პირობები შესრულდეს“, - განაცხადა ბორელიმ.
მან ასევე ხაზგასმით აღნიშნა, რომ შეიარაღებული დაპირისპირების მოსაგვარებლად რეგიონში არსებულმა ყველა მხარემ თავისი წვლილი უნდა შეიტანოს.
