„სამოქალაქო პლატფორმა 20/20“-სა და ცენტრ „ემპათიას“ შორის ურთიერთშეთანხმების მემორანდუმი გაფორმდა. ინფორმაციას „სამოქალაქო პლატფორმა 20/20” ავრცელებს.

მათი ცნობით, მემორანდუმის თანახმად, "სამოქალაქო პლატფორმა 20/20" განახორციელებს ადამიანის უფლებების დარღვევის ფაქტების გამოვლენას და დოკუმენტირებას 2020 წლის 31 ოქტომბერს ჩასატარებელი საპარლამენტო არჩევნების წინასაარჩევნო პერიოდში და არჩევნების დღეს. "სამოქალაქო პლატფორმა 20/20" გამოვლენილი მართლსაწინააღმდეგო ფაქტების, ადამიანის უფლებათა დარღვევების, ამომრჩეველთა თავისუფალი ნების გამოვლენაზე ზემოქმედების და საარჩევნო ადმინისტრაციის საქმიანობის შესახებ ინფორმაციას ცენტრ „ემპათიას“ გადასცემს.

ცენტრი „ემპათია“, თავის მხრივ, განახორციელებს მიღებული ინფორმაციის ანალიზს, სამართლებრივ რეაგირებას და სამედიცინო დახმარებას პოტენციურ მხვერპლთათვის.

მათივე ინფორმაციით, “სამოქალაქო პლატფორმა 20/20” ცესკო-ს მიერ რეგისტრირებულია, როგორც ადგილობრივი სადამკვირვებლო ორგანიზაცია, რომელიც 2020 წლის 31 ოქტომბრის საპარლამენტო არჩევნებს და მიმდინარე საარჩევნო პროცესს აკვირდება.