ყირგიზეთის პრეზიდენტმა პარლამენტის მიერ დანიშნული პრემიერ-მინისტრი პოსტზე არ დაამტკიცა
ყირგიზეთის პრეზიდენტმა სოორონბაი ჟეენბეკოვმა სადირ ჯაფაროვი პრემიერ-მინისტრის პოსტზე არ დაამტკიცა, - ამის შესახებ ინფორმაციას BBC-ი ავრცელებს.
გამოცემის ცნობით, პრეზიდენტმა პარლამენტის წევრებს მოუწოდა, პრემიერ-მინისტრობის კანდიდატს კენჭი ხელახლა უყარონ, ვინაიდან პრეზიდენტის განმარტებით, არსებობს კითხვები იმასთან დაკავშირებით, თუ რამდენად სწორად დაიცვეს კანონმდებლებმა კენჭისყრის წესები, როცა მათ პრემიერ-მინისტრად სადირ ჯაფაროვი დანიშნეს.
შეგახსენებთ, ყირგიზეთში პოლიტიკური კრიზისი 4 ოქტომბერს ჩატარებული საპარლამენტო არჩევნების შემდეგ დაიწყო. არჩევნების ოფიციალურის შედეგების გასაპროტესტებლად ქუჩებში ათასობით ადამიანი გამოვიდა. ქვეყნის ცენტრალურმა საარჩევნო კომისიამ არჩევნების შედეგები გააუქმა. 9 ოქტომბერს პრეზიდენტმა სოორონბაი ჟეენბეკოვმა ხელი მოაწერა ბრძანებულებას პრემიერ-მინისტრს კუბატბეკ ბორონოვის მთავრობის გადადგომის შესახებ და განაცხადა, რომ მზადაა, ახალი მთავრობის დამტკიცებისთანავე გადადგეს. ყირგიზეთის პარლამენტმა ახალ პრემიერ-მინისტრად ოპოზიციური პარტიის ლიდერი სადირ ჯაფაროვი დასახელა, რომელიც სასჯელს ადამიანის მძევლად აყვანისთვის იხდიდა და რომელიც დემონსტრანტებმა გასულ კვირას სხვა დაკავებულ პოლიტიკოსებთან ერთად ციხიდან გაათავისუფლეს.
