ტაილანდის მთავრობამ ქვეყანაში მიმდინარე ანტისამთავრობო საპროტესტო აქციების ფონზე საგანგებო განკარგულება გამოსცა, რომელიც ხუთზე მეტი პირის შეკრებისა და სენსიტიური შინაარსის ინფორმაციის გავრცელების აკრძალვას ითვალისწინებს.

საგანგებო განკარგულების ძალაში შესვლიდან 30 წუთის შემდეგ სპეცრაზმმა პრემიერ-მინისტრ პრაიუტ ჩან-ოჩას გადადგომის მოთხოვნით მის ოფისთან შეკრებილი დემონსტრანტების დაშლა დაიწყო და 20 ადამიანი დააკავა. პოლიციის ინფორმაციით, დაკავებულებს შორის საპროტესტო აქციების რამდენიმე ლიდერიცაა.

ტაილანდში საპროტესტო აქციების ახალი ტალღა მიმდინარე წლის თებერვალში დაიწყო. დემონსტრანტები პრემიერ-მინისტრ პრაიუტ ჩან-ოჩას გადადგომას, მეფის ძალაუფლების შემცირებასა და ახალ კონსტიტუციას ითხოვენ.