რუსული მედია - ევროკავშირი ნავალნის საქმესთან დაკავშირებით სანქციებს რუსეთის უსაფრთხოების ფედერალური სამსახურის დირექტორს, კიდევ 5 მაღალჩინოსანსა და ერთ ორგანიზაციას უწესებს
ევროკავშირი რუსი ოპოზიციონერის, ალექსეი ნავალნის საქმესთან დაკავშირებით სანქციებს რუსეთის უსაფრთხოების ფედერალური სამსახურის დირექტორს ალექსანდრე ბორტნიკოვს, პრეზიდენტის ადმინისტრაციის უფროსის პირველ მოადგილე სერგეი კირიენკოს, 4 სხვა რუს მაღალჩინოსანსა და ერთ ორგანიზაციას უწესებს, - ამის შესახებ ინფორმაციას რუსული მედია ავრცელებს.
მათივე ინფორმაციით, ევროკავშირის სასანქციო სიაში ორგანიზაცია ორგანული ქიმიისა და ტექნოლოგიის სახელმწიფო სამეცნიერო კვლევითი ინსტიტუტიც (GosNIIOKhT) შედის. სანქციების თანახმად, ევროკავშირში მოქმედ ბიზნესებს აღნიშნულ ინსტიტუტთან რაიმე სახის კავშირი ეკრძალებათ.
გარდა ამისა, ევროკავშირის მიერ დაწესებული შეზღუდვები ითვალისწინებს ევროკავშირის ტერიტორიაზე შესვლის აკრძალვასა და ევროპულ ბანკებში ფინანსური აქტივების გაყინვას.
