დაავადებათა კონტროლის ცენტრის ხელმძღვანელი ამირან გამყრელიძე განმარტავს, რომ პირველ ეტაპზე, სახელმწიფოს მიერ შესყიდული გრიპის ვაქცინა რისკ-ჯგუფებში შემავალ პირებს მოხმარდება.
“სახელწმიფოს ნაყიდი აქვს გრიპის ვაქცინის 135 ათასი დოზა. უკვე შემოსულია 25 ათასი ვაქცინა და დარიგებულია პოლიკლინიკებში. პირველ ეტაპზე, უნდა აიცრან ყველაზე მაღალი რისკის ჯგუფში მყოფები: ორსულები, მოხუცთა სახლებში მყოფი პირები, ბავშვთა სახლებისა და ბაღების აღმზრდელები, ასევე შიდსისა და C ჰეპატიტის მკურნალობაზე მყოფი პაციენტები. ამის შემდეგ ვაქცინის 110 ათასი დოზა შემოდის, რომელიც განაწილდება სხვა რისკ ჯგუფებზე, როგორიც არის სამედიცინო პერსონალი, 65 წელს ზემოთ მყოფი ადამიანები, ვისაც ქრონიკული დაავადებები აქვთ“, - განაცხადა ამირან გამყრელიძემ.
მისი თქმით, მთავრობის მიერ გადაწყვეტილება მიღებულია გრიპის ვაქცინის დამატებით 100 ათასი დოზის შემოტანაზე. დიდი ალბათობით ოქტომბრის ბოლომე 77 ათასი დოზა უნდა შემოვიდეს, ხოლო ამის შემდეგ, ნოემბრის მეორე ნახევარში, დამატებითი დოზები. გარდა ამისა, როგორც ამირან გამყრელიძემ განაცხადა, კერძო სექტორს შემოტანილი აქვს 20 ათასამდე-მდე დოზა, რაც დაიხარჯა, ხოლო ოქტომბრის ბოლოს-ნოემბრის დასაწყისისთვის კეთდება ვაქცინის 40 ათასი დოზის მობილიზაცია.