მომავალში მთიან ყარაბაღში მშვიდობიანად უნდა იცხოვრონ აზერბაიჯანელებმა და სომხებმა , - ამის შესახებ აზერბაიჯანის პრეზიდენტმა ილჰამ ალიევმა „რია ნოვოსტისთან“ ინტერვიუში განაცხადა.

ილჰამ ალიევის თქმით, მისი, როგორც სახელმწიფოს მეთაურის უმთავრესი ამოცანაა, გაამართლოს აზერბაიჯანელი ხალხის ნდობა.

„რაც შეეხება ისტორიაში როლს, იცით, რომ ამის შესახებ არც ადრე მიფიქრია, ახლა კი მითუფრო. ჩემი მთავარი ამოცანაა, გავამართლო აზერბაიჯანელი ხალხის ნდობა, შევასრულო ის დაპირება, რომელიც მივეცი მათ მთელი ამ წლების განმავლობაში, რაც ამ თანამდებობაზე ვარ“ , - განაცხადა ალიევმა.

მისივე თქმით, სომხები და აზერბაიჯანელები მშვიდობიანად თანაცხოვრობენ აზერბაიჯანის სხვა დასახლებულ პუნქტებშიც, მათ შორის ბაქოში, სადაც მრავალათასიანი სომხური თემია.