ეს ორი კვირა ღირსეულად უნდა გავიაროთ და ღირსეულად უნდა გავიმარჯვოთ. ეს უნდა გავაკეთოთ ისე, როგორც გავუმკლავდით პირველ ტალღას, დავიცავით ჩვენი მოქალაქეების ჯანმრთელობა, დავიცავით ჩვენი ეკონომიკა, - ამის შესახებ საქართველოს პრემიერ-მინისტრმა, გიორგი გახარიამ გურიაში „ქართული ოცნების” ოზურგეთის, ლანჩხუთისა და ჩოხატაურის მაჟორიტარი დეპუტატობის კანდიდატის ვასილ ჩიგოგიძის წარდგენისას განაცხადა.
პრემიერის თქმით, მომდევნო ორი კვირა გამოწვევებით სავსე იქნება. მისივე განცხადებით, კოვიდთან ბრძოლაში მნიშვნელოვანია ერთიანობა და მაღალი მოქალაქეობრივი პასუხისმგებლობა.
„როგორც ვამბობდით, დავდექით მეორე ტალღის გამოწვევის წინაშე. ყველას უნდა გვესმოდეს, რომ ერთიანობა, ერთად ყოფნა და დიდი სამოქალაქო პასუხისმგებლობა არის გამოსავალი, რომ ჩვენ კოვიდთან ბრძოლის მეორე ტალღაც დავამარცხოთ და რაც მთავარია, დავამარცხოთ ისე, რომ გადავარჩინოთ ჩვენი ეკონომიკა, დავიცვათ თითოეული სამუშაო ადგილი და ამასთან ერთად, პარალელურად ჩავატაროთ ყველაზე დემოკრატიული, ღირსეული არჩევნები. ეს ძალზედ მნიშვნელოვანია. ეს სერიოზული გამოწვევაა,რომელსაც დარწმუნებული ვარ, რომ ჩვენ ერთიანობით გავუმკლავდებით“, - განაცხადა გახარიამ.