რამდენი ადმინისტრაცია გამოიცვალა აჭარამ დამოუკიდებლობის აღდგენამდე და დამოუკიდებლობის აღდგენის შემდეგ, ერთის გაკეთებული საქმე გახსოვთ? ახლა შეხედეთ აჭარას, რომელიც ლევან ვარშალომიძემ, მისმა გუნდმა დაუღალავი შრომით, პატიოსნებით, კორუფციის და ნეპოტიზმის აღმოფხვრით შავი ზღვის მარგალიტად აქცია,- ამის შესახებ „ნაციონალური მოძრაობის” თავმჯდომარემ გრიგოლ ვაშაძემ ბათუმში განაცხადა, სადაც გაერთიანებული ოპოზიაცია “ძალა ერთობაშია” ამომრჩეველს ხვდება.

როგორც ვაშაძემ განაცხადა, ბათუმში „ძალა ერთობაშიას” მაჟორიტარობის კანდიდატმა ლევან ვარშალომიძემ საქართველოსთვის უკრაინაში ისეთი თანამდებობა დატოვა, „რომელსაც „ქართული ოცნების” წარმომადგენელი არა თუ არ დატოვებდა, ვერც იოცნებებდა”.

„ვინმეს ეჭვი ეპარება, რომ ლევან ვარშალომიძე ბათუმში მაჟორიტარულ არჩევნებს მოიგებს? ყველა აჭარელს მინდა ვუთხრა, ლევანმა საქართველოსთვის კიდევ ერთხელ დატოვა ისეთი თანამდებობა, რომელსაც “ქართული ოცნების” წარმომადგენელი არა თუ არ დატოვებდა, ვერც იოცნებებდა.

ჩამოვიდა იმისთვის, რომ ჩვენი შვილების და შვილიშვილების მომავალი უზრუნველყოს, რომ არ ოცნებობდეს ქართველი ემიგრაციაზე, რომ ქართველს მონური შრომა არ უწევდეს სახელმწიფოს ფარგლებს გარეთ”,- განაცხადა ვაშაძემ.