„ქართული ოცნების“ აღმასრულებელი მდივნის ირაკლი კობახიძის განცხადებით, არჩევნების გადადების არანაირი საფუძველი არ არსებობს და ოპოზიციის მხრიდან აღნიშნული განცხადებების გაკეთება სხვა არაფერია თუ არა საარჩევნო კაპიტულაცია და სასოწარკვეთილების გამოხატულება. ამის შესახებ მან „ქართული ოცნების“ ოფისში გამართულ ბრიფინზე განაცხადა.

„ეს მესიჯები არჩევნებამდე ორი კვირით ადრე, ნიშნავს უკვე სრულ კაპიტულაციას ოპოზიციის მხრიდან. ისინი ხედავენ, რომ რეალურად არავითარი შანსი არ აქვთ იმისა, რომ წარმატებას მიაღწიონ ამ არჩევნებში, შესაბამისად, ორი კვირით ადრე უკვე გამოაცხადეს პრაქტიკული საარჩევნო კაპიტულაცია, ეს სხვა არაფერი არ არის.

რაც შეეხება არჩევნების გადადებას, ამის საფუძველი არ არსეობს. რა თქმა უნდა, როცა იყო კოვიდის პირველი ფაზა და პირველი ტალღა ამ შემთხვევაში, არაერთ ქვეყანაში ასეთი ზომა იყო მიღებული, თუმცა მეორე ტალღის პირობებში, არჩევნების გადადებაზე საუბარი არის მხოლოდ და მხოლოდ კაპიტულაციის გამოვლენა და თქვენ გახსოვთ, მაგალითად, ამერიკის შეერთებულ შტატებში პრეზიდენტმა ტრამპმა გააკეთა მინიშნება არჩევნების გადადებასთან დაკავშირებით და ყველა ამის საწინააღმდეგოდ გამოვიდა და ყველა დაუპირისპირდა ამის შესაძლებლობასაც კი, რომ ამერიკის შეერთებულ შტატებში არჩევნები გადადებულიყო, რომელიც საქართველოს საპარლამენტო არჩევნებიდან რამდენიმე დღეში ტარდება. როცა ვსაუბრობთ სასოწარკვეთილებაში გადავარდნილ პოლიტიკურ სუბიექტებზე, ესეც არის სასოწარკვეთილების მორიგი გამოვლინება.

ჯერ გუშინ სცადეს, რომ ხელოვნურად ხელი შეეწყოთ ვირუსის გავრცელებისთვის და ეს არის წარმოუდგენელი მავნებლობა, თან ვირუსის რაიონებიდან გატანის მცდელობა იყო იმიტომ, რომ სამარშრუტო ტაქსებით ჩამოჰყავდათ ადამიანები ბათუმში, სადაც არის ვირუსის კონცენტრაცია და მერე აბრუნებდნენ სხვა რაიონებში. ამ სასოწარკვეთილების მეორე გამოხატვა არის ეს კაპიტულაცია, რასაც ადასტურებს განცხადებები არჩევნების გადადებასთან დაკავშირებით. არანაირი საფუძველი არჩევნების გადადების, ბუნებრივია, არ არსებობს,“- განაცხადა ირაკლი კობახიძემ.