საქართველოს პარლამენტის თავმჯდომარის, არჩილ თალაკვაძის განცხადებით, ცივილიზებულ დასავლურ სამყაროში წინასაარჩევნო კამპანია ტარდება დისტანციის დაცვით, პირბადისა და დეზინფექციის საშუალებების გამოყენებით. თალაკვაძის შეფასებით, ამ ფონზე ის, რაც გუშინ „ნაციონალურმა მოძრაობამ“ გააკეთა, იყო თავდასხმა საზოგადოებრივ ჯანდაცვაზე.
„როგორ უნდა ჩატარდეს წინასაარჩევნო კამპანია თუ ამას თქვენ ჯერ კიდევ ვერ ხვდებით შუა საარჩევნო კამპანიაში, გირჩევთ აჩვენოთ თქვენს მხარდამჭერებს, როგორ ატარებს საარჩევნო კამპანიას „ქართული ოცნება“, დისტანციის დაცვით, პირბადის გამოყენებით, დეზინფექციის საშუალებებით გამოყენებით, თერმოკონტროლითა და იმ პასუხისმგებლობით, რასაც ჰქვია საზოგადოების ჯანმრთელობა და უსაფრთხოება. აი, ასე ტარდება ცივილიზებულ დასავლურ ქვეყნებში კამპანიები. რაც გუშინ ვნახეთ აჭარაში, ეს იყო ყოველგვარი გონივრული ფარგლების მიღმა და ეს იყო უბრალოდ სამარცხვინო თავდასხმა საკუთარი ქვეყნის საზოგადოებრივ ჯანმრთელობაზე,“- განაცხადა თალაკვაძემ.