რამდენიმე დღის განმავლობაში მოსულმა უხვმა ნალექმა ვიეტნამის ცენტრალურ ნაწილში, კუანგჩის პროვინციაში წყალდიდობა და ღვარცოფი გამოიწვია, რასაც სულ მცირე 64 ადამიანის სიცოცხლე ემსხვერპლა.

წყალდიდობის გამო ათასობით ადამიანი იძულებული გახდა დასახლებული პუნქტები დაეტოვებინა და დროებით თავშესაფარში გადასულიყო.

Reuters-ის ინფორმაციით, ძლიერი წვიმების შედეგად პროვინციის ერთ-ერთი სამხედრო ობიექტის ტერიტორიაზე მეწყერი ჩამოწვა, სადაც უბედური შემთხვევის დროს 22 ჯარისკაცი იმყოფებოდა. მაშველები დაკარგულ სამხედროებს ეძებენ.

სინოპტიკოსების პროგნოზით, უხვი ნალექი კიდევ რამდენიმე დღე გაგრძელდება. მათი თქმით, მსგავსი წყალდიდობა ქვეყანაში ბოლო 20 წელია არ ყოფილა.