დღეს ჩვენ შევიკრიბეთ იმიტომ, რომ გავიმარჯვოთ დიდ გველეშაპზე , - ამის შესახებ ფონდ „იავნანას“ დამფუძნებელმა პაატა ბურჭულაძემ ოზურგეთში განაცხადა, სადაც „ნაციონალურმა მოძრაობამ“ მაჟორიტარობის კანდიდატი მანუჩარ კვირკველია წარადგინეს.
პაატა ბურჭულაძემ ღონისძიებაზე შეკრებილებს ონლაინ, უცხოეთიდან მიმართა, მან „ნაციონალური მოძრაობის“ კანდიდატს მხარდაჭერა გამოუცხადა და წარმატებები უსურვა.
ასევე ისაუბრა „ქართული ოცნების“ ხელისუფლებაზე და აღნიშნა, რომ „ბიძინა ივანიშვილის კრედო არის გადაგდება, მოტყუება და ღალატი.“
„დღეს ჩვენ შევიკრიბეთ იმიტომ, რომ გავიმარჯვოთ დიდ გველეშაპზე, რომელიც ნელ-ნელა ეპატრონება ქართულ მიწას და სურს ქართული მიწა ქართველების გარეშე, რომელიც საქართველოში აღვივებს მტრობას და უნდა დაეპატრონოს მთელ საქართველოს და სურს ქართველები წავიდნენ საქართველოდან. მას არ სჭირდება საქართველოს მოქალაქე, მას სჭირდება ქართული მიწა. ვერ დამისახელებთ ვერცერთ მის დაპირებას, რასაც 2012 წელს დაგვპირდა ბიძინა ივანიშვილი და შეასრულა. მისი კრედო არის გადაგდება, მოტყუება, ღალატი. ამიტომაც არის, რომ არცერთი თავმოყვარე ადამიანი აღარ დგას მის გვერდში და მან მიატოვა მისი გუნდი“, - განაცხადა ბურჭულაძემ.