შვეიცარიაში, კორონავირუსის მეორე ტალღასთან ბრძოლის ფარგლებში, შეზღუდვები მკაცრდება, - ამის შესახებ ინფორმაციას Reuters-ი ავრცელებს.

სააგენტოს ინფორმაციით, ქვეყანაში დღეიდან ყველა დახურულ საჯარო სივრცეში პირბადის ტარება სავალდებულო ხდება და 15 პირზე მეტის თავშეყრა იკრძალება. კერძოდ, მოქალაქეები ვალდებულები იქნებიან, პირბადეები საზოგადოებრივ ტრანსპორტში, მაღაზიებში, ბანკებში, ეკლესიებსა და კინოთეატრებში ატარონ.

გარდა ამისა, ხელისუფლება მოქალაქეებს მოუწოდებს, სახლიდან იმუშაონ იმ შემთხვევაში, თუკი ეს შესაძლებელია.

„კოვიდ 19-ის გავრცელების ტემპი ძალიან სწრაფად გაიზარდა. ზამთარი ახლოვდება და ძალიან მნიშვნელოვანია, რომ ვირუსის გავრცელება შევანელოთ. ყოველი დღე მნიშვნელოვანია,“- განაცხადა ქვეყნის პრეზიდენტმა სიმონეტა სომარუგამ.

მისივე თქმით, მთავრობა უფრო მკაცრ შეზღუდვებზე მუშაობს, რომელიც იმ შემთხვევაში დაწესდება, თუკი ახალი ზომები შედეგს არ მოიტანს.

ცნობისათვის, შვეიცარიაში, რომლის მოსახლეობა 8.6 მილიონია, პარასკევს კორონავირუსით ინფიცირების რეკორდულად მაღალი დღიური მაჩვენებელი - 3 105 შემთხვევა- გამოვლინდა. ქვეყანაში, საერთო ჯამში, 74 422 ადამიანია დაინფიცირებული, დაღუპულთა რაოდენობა კი 1 823-ია.