არსებული ინფორმაციით, სამეგრელო-ზემო სვანეთის პოლიციის უფროსი ავთო გალდავა და მასთან ერთად მძევლად აყვანილი 2 ადამიანი თავისუფლები არიან.

რა ვითარებაში მოხდა მძევლების გათავისუფლება ამ დროისთვის უცნობია.

უცნობია ისიც, თუ სად იმყოფება თავად თავდამსხმელი.

შეგახსენებთ, რამდენიმე საათის წინ "საქართველოს ბანკზე" თავდამსხმელმა ბანკის ტერიტორია სამ მძევალთან ერთად დატოვა. მძევლებს შორის სამხარეო პოლიციის უფროსი ავთო გალდავა იყო. გავრცელებული ცნობით, სწორედ გალდავა აწარმოებდა შეიარაღებულ პირთან მოლაპარაკებებს და ბანკში თანხა, რომელიც თავდამსხმელმა მოითხოვა, გალდავამ მიიტანა.

მედიამ თავდამსხმელის მიერ მძევლებთან ერთად ბანკის დატოვების კადრები გადაიღო, სადაც ჩანს, რომ შეიარაღებულ პირს სამი ადამიანი ხელშეკრული გამოჰყავს. ამასთან, ვიდეომასალის მიხედვით, თავდამსხმელი ბანკიდან ხელაწეული გამოდის, რომელშიც სავარაუდოდ, ხელყუმბარა ეჭირა.