ოპოზიცია ორიენტირებულია პროვოკაციაზე, ჩვენ კიდევ სართლიანობასა და სიმშვიდეზე,- ამის შესახებ ფრაქცია „ქართული ოცნების“ თავმჯდომარე რატი იონათამიშვილმა ჟურნლისტებთან დმანისში მომხდარი ინციდენტის კომენტირებისას განაცხადა. როგორც მან აღნიშნა, „ქართული ოცნების“ ოფისში შეიჭრნენ ადამიანები, რომელთა მიზანი იყო პროვოკაცია.

„ჩვენ ამას ადრეც ვვარაუდობდით, რომ რაც უფრო მოახლოვდება არჩევნების დღე, მით უფრო მეტი პროვოკაციის მცდელობა იქნება ჩვენი ოპონენტების მხრიდან. გუშინაც ვნახეთ ჩვენ ასეთი ინციდენტი, როცა “ქართული ოცნების” ოფისში შეიჭრნენ ადამიანები, რომელთა მიზანი მხოლოდ პროვოკაცია იყო. ცხადია, ნებისმიერ შემთხვევაში მოვუწოდებ ჩვენს აქტივს და მხარდამჭერებს, რომ არასდროს აყვნენ პროვოკაციებს, რადგან ნებისმიერი პროვოკაციის პასუხი არის 31 ოქტომბერის არჩევნების შედეგები. თუ სადმე ვინმე ვერ მოითმენს, სამართალდამცავები მოახდენენ მყისიერ, კანონიერ და სამართლიან რეაგირებას. უბრალოდ, აქ არის ერთი მნიშვნელოვანი განსხვავება, რაც განსახვავებს „ქართულ ოცნებას“ ოპონენტებისგან - თუ ვინმე აჰყვა პროვოკაციას ჩვენი მხრიდან, ამ შემთხვევაში რეაგირება ხდება სწრაფად და პროპორციულად, ხოლო ოპოზიცია მუდმივად გაურბის ამ მხრივ პასუხისმგებლობას. აი ეს ერთი მნიშვნელოვანი ნიშანიც განგვასხვავებს ჩვენ მათგან, რომ ისინი ორიეტირებულები არიან პროვოკაციაზე, ჩვენ კიდევ სართლიანობასა და სიმშვიდეზე,“- განაცხადა იონათამიშვილმა.

ცნობისთვის, დმანისში „ქართული ოცნების“ ოფისთან გუშინ ინციდენტი მოხდა. როგორც „ინტერპრესნიუსს“ შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 117-ე - ჯანმრთელობის განზრახ მძიმე დაზიანების და 236-ე - იარაღის უკანონო შეძენა-შენახვის მუხლით დაიწყო.