ჩეხეთის პრემიერ-მინისტრი ანდრეი ბაბიში კორონავირუსის გამო დაწესებული ახალი შეზღუდვების გამო საზოგადოებას ბოდიშს უხდის, - ამის შესახებ ინფორმაციას CNN-ი ავრცელებს.
„ბოდიშს გიხდით ახალი შეზღუდვების გამო, რომელიც გავლენას მოახდენს ბიზნესის მფლობელების, მოქალაქეების, დასაქმებულების ცხოვრებაზე. ვწუხვარ იმის გამო, რომ შეზღუდვების დაწესების შესაძლებლობა, ფაქტობრივად, გამოვრიცხე, რადგან ვერ წარმოვიდგენდი, რომ ეს მოხდებოდა,“- განაცხადა ანდრეი ბაბიშმა.
ჩეხეთში ახალი შეზღუდვები ძალაში გუშინ შევიდა და 3 ნოემბრამდე დარჩება. შეზღუდვები მოქალაქეების გადაადგილების შეზღუდვას, ზოგიერთი მომსახურების ცენტრებისა და ბიზნეს ობიექტების დახურვას და ქალაქის ნებისმიერ ტერიტორიაზე პირბადეების გამოყენების ვალდებულებას ითვალისწინებს.
ჩეხეთში, გასული დღის განმავლობაში, კორონავირუსის 14 968 ახალი შემთხვევა დადასტურდა, რაც რეკორდულად მაღალი დღიური მაჩვენებელია ქვეყნისთვის. ქვეყანაში, საერთო ჯამში, კორონავირუსის 208 915 შემთხვევაა დადასტურებული, აქედან გამოჯანმრთელებულია 83 136 და დაღუპულია 1 739 ადამიანი.