რუსეთის პრეზიდენტი ვლადიმერ პუტინი იმედოვნებს, რომ აშშ ყარაბაღის კონფლიქტის დარეგულირებაში დაეხმარება. ამის შესახებ მან დღეს „ვალდაის“ სხდომაზე განაცხადა.
„სომხეთისა და აზერბაიჯანის საგარეო საქმეთა მინისტრები კიდევ ერთხელ იყვნენ მოსკოვში ჩამოსული. 23 ოქტომბერს ისინი ვაშინგტონში ხვდებიან ერთმანეთს. ძალიან ვიმედოვნებ, რომ ჩვენი ამერიკელი პარტნიორები ჩვენთან უნისონში იმოქმედებენ და დაგვეხმარებიან დარეგულირებაში. იმედი დავიტოვოთ უკეთესობისთვის“, - განაცხადა პუტინმა.
მისი თქმით, ყარაბაღის კონფლიქტს თავიდანვე ჰქონდა ეთნიკური დაპირისპირების ხასიათი და დაიწყო სომეხი ხალხის მიმართ დანაშაულებით.
„ეს კონფლიქტი დაიწყო არა უბრალოდ, როგორც სახელმწიფოთაშორის კონფლიქტი და ტერიტორიისთვის ბრძოლა, არამედ ეთნიკური დაპირისპირებით. სამწუხაროდ, ეს ფაქტია, რომ სუმგაითში და შემდეგ მთიან ყარაბაღში განხორციელდა მძაფრი დანაშაული სომეხი ხალხის წინააღმდეგ. ჩვენ ეს ყველაფერი კომპლექსში უნდა გავითვალისწინოთ“ , - განაცხადა პუტინმა.
რუსეთის ლიდერის თქმით, სომხეთი და აზერბაიჯანი რუსეთისთვის თანაბარი პარტნიორები არიან, რუსეთს ყოველთვის განსაკუთრებული კავშირები აქვს მათთან.