ლიბიის დაპირისპირებულმა მხარეებმა ცეცხლის სამუდამოდ შეწყვეტის შესახებ შეთანხმებას მოაწერეს ხელი.

მედიის ინფორმაციით, ხელშეკრულებას ხელი ჟენევაში საერთაშორისოდ აღიარებული ეროვნული შეთანხმების მთავრობისა (GNA) და თვითგამოცხადებული ლიბიის ეროვნული არმიის (LNA) წარმომადგენლებს შორის გამართული შეხვედრის შემდეგ, გაეროს შუამდგომლობით, მოეწერა.

შეთანხმების თანახმად, დაქირავებული და უცხოელი მებრძოლები ლიბიას სამი თვის ვადაში დატოვებენ.

გაერომ აღნიშნული შეთანხმება „ისტორიულ მიღწევად“ შეაფასა.

ნოემბერში ეროვნული შეთანხმების მთავრობისა და ხალიფა ხაფთარის ლიბიის ეროვნული არმიის წარმომადგენლებს შორის პოლიტიკური კონსულტაციები გაიმართება.