სახელმწიფო აუდიტის სამსახურის პოლიტიკური ფინანსების მონიტორინგის დეპარტამენტის 2020 წლის 31 ოქტომბრის არჩევნების ფინანსური მონიტორინგის შუალედური ანგარიშის მიხედვით, 1-ელი სექტემბრიდან 12 ოქტომბრის ჩათვლით, ოპოზიციური პარტიებიდან რეკლამაში ყველაზე მეტი 1 864 982 ლარი „ნაციონალურმა მოძრაობამ“ დახარჯა. ჯამურად მისი ხარჯი 2 მლნ 230 ათას 757 ლარია, საიდანაც 9 ათას 523 ლარი პარტიამ შრომის ანაზღაურებაზე დახარჯა.

პარტიამ „ლელო საქართველოსთვის“ აღნიშნულ პერიოდში რეკლამაში 1 მლნ 793 ათას 441 ლარი დახარჯა. მისი ხარჯი სულ 2 მლნ 566 თას 897 ლარია, აქედან 242 ათას 942 ლარი შრომის ანაზღაურებისთვის გაწეული თანხაა.

რეკლამზე დახარჯული თანხით ოპოზიციურ პარტიებს შორის მესამე ადგილზეა „სტრატეგია აღმაშენებელი“. მისი სარეკლამო ხარჯი 1 მლნ 773 ათას 88 ლარია. ჯამურად ამ პარტიის ხარჯი 1 მლნ 856 ათას 467 ლარს შეადგენს, საიდანაც 3 ათას 824 ლარი შრომის ანაზღაურებაზე მოდის.

„ევროპულმა საქართველომ“ 1-ელი სექტემბრიდან 12 ოქტომბრის ჩათვლით რეკლამებისთვის 1 მლნ 634 ათას 575 ლარი გაიღო, ხოლო შრომის ანაზღაურებისთვის 14 ათას 694 ლარი დახარჯა, რაც ჯამში 2 მლნ 8 ათას 235 ლარია.

რაც შეეხება „პატრიოტთა ალიანსის“ ხარჯს, პარტიამ რეკლამაში 953 ათას 478 ლარი დახარჯა. ჯამურად მისი ხარჯი 1 მლნ 242 ათას 466 ათას ლარს შეადგენს და აქედან 55 ათას 388 ლარი შრომითი ანაზღაურებისთვის გაღებული თანხაა.

აუდიტის სამსახურის ანგარიშის მიხედვით, 1-ელი სექტემბრიდან 12 ოქტომბრის ჩათვლით საარჩევნო პოლიტიკური სუბიექტების ხარჯებმა სულ 22 მლნ 973 ათას 913 ლარი შეადგინა.